Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 118 Hüküm no: 59 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahimpaşa mahallesinden Emine bt. Abdullah’ın bazı eşyalarını Hadice bt. Mehmed’e satması Eşyâ mübâya‘ası Mahmiye-i İslâmbol’da Silivrikapısı dâhilinde İbrahim Paşa mahallesinde sâkine ve zâtı vech-i şer‘î üzere mu‘arrefe olan Emine bt. Abdullah nâm hatun meclis-i şer‘-i şerîf-i enverde kezâlik zâtı mu‘arrefe olan işbu râfi‘atü’l-vesîka Hadice bt. Mehmed nâm hatun mahzarında ikrâr ve takrîr-i kelâm [edip] yedimde mâlım ve mülküm olan on miskāl bir çift altın bileziğimi hibe-i sahîha-i şer‘iye ile mezbûre Hadice Hatun’a hibe ve temlik ve teslîm eylediğimde ol dahi meclis-i hibede bilâ-mâni‘ ittihâb ve temellük ve tesellüm ve kabz u kabûl eyledikden sonra eşyâ-i sâire-i memlûkemden iki minder ve iki yorgan bâ-çârşeb ve bir baş yasdığı ve üç bilek ve iki alaca entari ve bir şalvar ve bir şerîtli şali cübbe ve bir hamam rahtı ve bir baş yemenisi ve bir orta keçesi ve bir çuka ferâce ve iki tencere bâ-kapak ve üç sahan ve bir güğüm ve bir sini ve bir tâbe ve iki kahve ibriği ve bir maşrabamı tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûre Hadice Hatun’a otuz guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr otuz guruş mutâlebesinden dahi mezbûre Hadice Hatun’un zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm zikr olunan bilezik-i mezbûre Hadice Hatun’un mülk-i mevhûbesi ve eşyâ-i muharrere-i mezkûre dahi mülk-i müşterâsı ve hakk-ı sarfı olup benim aslâ alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 5 Zilka‘de sene 1196 Şühûdü’l-hâl: Kahveci İbrahim Beşe b. Mustafa, Mehmed Beşe b. Mehmed, Molla Ali b. Halil, el-Hâc Hasan b. Osman, Molla Mehmed b. Mustafa.