Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 118 Hüküm no: 60 Orijinal metin no: [9a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mustafa’nın Kâtib Murad mahallesindeki enkazını kocası Hafız Mehmed’e satması Enkāz mübâya‘ası Mahmiye-i İslâmbol’da Sultan Bâyezid-i Veli -tâbe serâhû- Câmi‘-i şerîfi kurbünde ( ) mahallesinde sâkine ve zâtı vech-i şer‘î üzere mu‘arrefe olan Âişe bt. Mustafa nâm hatun meclis-i şer‘-i hatîr-i lâzımü’t-tevkīrde hâlâ zevci işbu râfi‘ü’l-vesîka Hafız Mehmed b. Ahmed nâm kimesne mahzarında ikrâr-ı tam ve takrîr-i kelâm edip mahmiye-i mezbûrede Mevlevîhâne Kapısı dâhilinde Kâtib Murad mahallesinde vâki‘ etrâf-ı erba‘ası el-Hâc Mehmed menzili ve Mehmed Said menzili ve Buhûrî Hüseyin Ağa menzili ve tarîk-i âm ile mahdûd terbî‘an yedi yüz zirâ‘ mukāta‘alı arsa üzerinde mevcûd bi’l-cümle enkāz-ı ma‘lûme bâ-hüccet-i şer‘iye yedimde mülk ve hakkım olmağla ben arsa-i mezkûre üzerinde mevcûd olan bi’l-cümle enkāz-ı ma‘lûmeyi tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcim mezbûr Hafız Mehmed’e yetmiş guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm yetmiş guruş mutâlebesinden dahi zevcim mezbûr Hafız Mehmed’in zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm arsa-i mezkûre üzerinde mevcûd bi’l-cümle enkāz-ı ma‘lûme zevcim mezbûr Hafız Mehmed’in mülk-i müşterâsı ve hakk-ı sarfı olup benim aslâ alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 8 min-Zilka‘deti’ş-şerîfe sene 1196 Şühûdü’l-hâl: Kahveci İbrahim Beşe b. Mustafa, Molla İbrahim b. Yusuf, Abdullah Çelebi b. Yusuf, Muhzır Salih b. Halil, el-Hâc Hasan b. Osman, Mehmed Salim Efendi b. Hüseyin, Tahtacı Molla Ali b. Halil ve gayruhum.