Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 119 Hüküm no: 61 Orijinal metin no: [9a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayezid Ağa mahallesinden Şeyh Yusuf Hakkı Efendi’nin Molla Gürani mahallesindeki arsasını Hafız Mustafa Efendi’ye satması Arsa mübâya‘ası Mahmiye-i İslâmbol’da Topkapısı dâhilinde Bâyezi[d] Ağa mahallesinde sâkin es-Seyyid eş-Şeyh Yusuf Hakkı Efendi b. Ali Ağa meclis-i şer‘-i şerîf-i enverde işbu bâ‘isü’l-vesîka Hafız el-Hâc Mustafa Efendi b. el-Hâc Ali tarafından ber-vech-i âtî tasdîka vekîl olduğu ber-nehc-i şer‘î sâbit olan es-Seyyid Mustafa Ağa b. Abdullah mahzarında ikrâr ve takrîr-i kelâm edip mahmiye-i mezbûrede Molla Gürânî mahallesinde vâki‘ bir tarafdan mevâlî-i i‘zâmdan Ahmed Efendi mülkü ve bir tarafdan Mühürdâr Mehmed Ağa bağçesi ve bir tarafdan el-Hâc Mustafa Ağa mülkü ve bir tarafdan tarîk-i âm ile mahdûd terbî‘an kırk zirâ‘ üç kepenk muhterik berber dükkânı arsamı tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkil-i mezbûr Hafız el-Hâc Mustafa Efendi’ye iki yüz kırk beş guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr iki yüz kırk beş guruşu müvekkil-i mezbûr yedinden tamamen ahz ü kabz edip ba‘de’l-yevm arsa-i mahdûde-i mezkûre müvekkil-i mezbûr Hafız el-Hâc Mustafa Efendi’nin mülk-i müşterâsı ve hakk-ı sarfı olup benim aslâ alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 6 Zilka‘de sene 1196 Şühûdü’l-hâl: İsmail Efendi b. Ahmed, Hafız Numan Efendi b. Süleyman, Veliyüddin Beşe b. Bektaş, Molla Ali b. Halil.