Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 120 Hüküm no: 62 Orijinal metin no: [9a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bazergân mahallesinden Fatma bt. Halil’in kocasından boşanması Muhâla‘a Mahmiye-i İslâmbol’da Koca Mustafa Paşa kurbünde Bâzergân mahallesinde sâkine Fatıma bt. Halil nâm hatun tarafından vech-i âtî üzere hul‘ ve ibrâya vekîl olduğu zât-ı mezbûreyi ârifân es-Seyyid Abdülaziz b. es-Seyyid eş-Şeyh Ahmed Nureddin ve es-Seyyid Mehmed Vehbi b. Ali nâm kimesneler şehâdetleriyle sâbit olan mahalle-i mezbûre imâmı es-Seyyid Hüseyin Efendi b. es-Seyyid el-Hâc Hasan meclis-i şer‘-i şerîf-i enverde müvekkile-i mezbûrenin zevci işbu bâ‘isü’l-kitâb Ahmed Ataullah b. Derviş Kasım mahzarında bi’l-vekâle ikrâr ve takrîr-i kelâm edip mezbûr Ahmed Ataullah müvekkilem mezbûre Fatıma Hatun’un zevc-i dâhili olup lâkin beynlerinde hüsn-i mu‘âşeretleri olmayıp müvekkilem mezbûre hul‘a tâlibe olduğu ecilden zevci mezbûrun zimmetinde mütekarrer ve ma‘kūdun-aleyh olan yirmi beş guruş mehr-i müecceli ve nafaka-i iddet-i ma‘lûmesi üzerlerine ve meûnet-i süknâsı dahi müvekkilem mezbûrenin kendi üzerine olmak üzere müvekkilem mezbûre Fatıma Hatun’u zevci mezbûr Ahmed Ataullah ile muhâla‘a-i sahîha-i şer‘iye ile ben bi’l-vekâle muhâla‘a eylediğimde mezbûr Ahmed Ataullah dahi hul‘-ı mezbûru ba‘de’l-kabûl hukūk-ı zevciyete ve sâire müte‘allika âmme-i de‘âvî ve kâffe-i mutâlebâtdan mezbûr Ahmed Ataullah’ın zimmetini bi’l-vekâle ibrâ ve ıskāt eylediğimde mezbûr Ahmed Ataullah dahi kezâlik hukūk-ı zevciyete ve sâire müte‘allika âmme-i de‘âvîden müvekkilem mezbûre Fatıma Hatun’un zimmetini ibrâ ve ıskāt edip herbirimiz ber-minvâl-i muharrer bi’l-asâle ve bi’l-vekâle âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 6 Zilka‘de sene 1196 Şühûdü’l-hâl: Ahmed b. el-Hâc İsmail, Mehmed Emin b. Ahmed, Ahmed b. Mehmed, Abdullah b. Musa, diğer Ahmed b. Mehmed, es-Seyyid Mehmed Vehbi b. Ali, es-Seyyid Abdülaziz b. es-Seyyid eş-Şeyh Ahmed Nureddin.