Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 121 Hüküm no: 63 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cafer Ağa mahallesinden Ayşe bt. Abdullah’ın Süleyman b. Abdullah’a bazı zinet eşyalarını hibe etmesi ve bazı eşyalarını da satması Eşyâ mübâya‘ası Mahmiye-i İslâmbol’da Cafer Ağa mahallesinde sâkine ve zâ[tı] ta‘rîf-i şer‘î ile mu‘arrefe Âişe bt. Abdullah nâm hatun meclis-i şer‘-i şerîf-i enverde işbu bâ‘isü’l-kitâb Süleyman b. Ahmed nâm kimesne mahzarında ikrâr ve takrîr-i kelâm edip yedimde mâlım olan bir çift altın bilezik ve bir tek altın kuşak ve zümrüd taşlı bir çift altın küpe ve bir sîm sâ‘atimi hibe-i sahîha-i şer‘iye ile mezbûr Süleyman’a hibe ve temlik ve teslîm eylediğimde ol dahi ber-vech-i muharrer ittihâb ve temellük ve tesellüm ve kabz u kabûl eyledikden sonra eşyâ-i memlûkemden bâ-defter-i müfredât yün sekiz çatma yasdık ve iki minder ve iki baş yasdığı ve bir beledî döşek ve üç yemeni yorgan bâ-çârşeb ve bir şilte ve bir gömlek ve iki don ve iki Şam alacası entari ve bir şali cübbe ve bir şalvar ve bir havlu ve üç top bez ve bir seccâde ve bir sofra ve bir bilek ve dört sahan ma‘a kapak ve üç tencere bâ-kapak ve bir çorba tası ve bir mankāl ve bir tâbe ve bir maşraba ve dört şamdan ve iki kadayıf tepsisi ve bir sini ve bir leğen ma‘a ibrik ve iki kahve ibriği ve bir lenger, biri tahta ve ikisi sepet üç sandığımı dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûr Süleyman’a kırk guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr kırk guruş mutâlebesinden mezbûr Süleyman’ın zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm zikr olunan huliyyât ve sâ‘at mezbûr Süleyman’ın mülk-i mevhûbu ve eşyâ-i muharrere-i mezkûre dahi mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 7 min-Zilka‘de sene 1196 Şühûdü’l-hâl: Mustafa b. Mustafa, Molla Mehmed b. Mustafa, Hacı Hasan b. Osman, Salih b. Halil, Molla Ali b. Halil.