Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 121 Hüküm no: 64 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arabacı Bayezid mahallesinden Nazmi b. Abdullah’ın arsasını mahalle imamı Ahmed Efendi’ye satması Arsa mübâya‘ası Mahmiye-i İslâmbol’da Arabacı Bâyezid mahallesinde sâkin es-Seyyid el-Hâc Nazmi b. es-Seyyid el-Hâc Abdullah meclis-i şer‘-i şerîf-i enverde mahalle-i mezbûre imâmı işbu bâ‘isü’l-kitâb Ahmed Efendi b. el-Hâc Ali mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan benim vakfım ve iki tarafdan müşterî-i mezbûr Ahmed Efendi’nin arsası ve bir tarafdan tarîk-i âm ile mahdûd bi-hesâbı terbî‘i yüz beş zirâ‘ mülk arsamı tarafeynden îcâb ve kabûlü [hâvî] bey‘-i bâtt-ı sahîh-i şer‘î ile mezbûr Ahmed Efendi’ye yirmi beş guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi beş guruşu mezbûr Ahmed Efendi yedinden tamamen ahz ü kabz eyledim, ba‘de’l-yevm arsa-i mahdûde-i mezkûre mezbûr Ahmed Efendi’nin mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 7 Za sene 1196 Şühûdü’l-hâl: Es-Seyyid Hüseyin Efendi b. Musa Müezzin, Mustafa Ağa b. Murtaza, Kıncı Mehmed b. Mustafa, Ali Odabaşı b. Mehmed, Hoca Mustafa Efendi b. Mehmed, Mehmed Emin Ağa b. el-Hâc İsmail, Bostanî İbrahim Ağa, Hafız Mustafa Efendi.