Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 122 Hüküm no: 65 Orijinal metin no: [9b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mimaracem mahallesinden Ümmügülsüm bt. Ömer’in esamesini Emine bt. İbrahim’e devretmesi Esâme kasr-ı yedi Mahmiye-i İslâmbol’da Mevlevîhâne Yenikapısı dâhilinde Mi‘mâr Acem mahallesinde sâkine ve zâtı vech-i şer‘î üzere mu‘arrefe olan Ümmügülsüm bt. Ömer nâm hatun meclis-i şer‘-i şerîf-i enverde kezâlik mu‘arrefetü’z-zât işbu bâ‘isetü’l-vesîka Emine bt. İbrahim nâm hatun mahzarında ikrâr ve takrîr-i kelâm edip ben İslâmbol Duhân Gümrüğü Mukāta‘ası mâlından almak üzere Yusuf Mustafa Çavuş Kalyon ismiyle mutasarrıf olduğum yevmî on üç akçe vazîfemi bundan akdem hüsn-i rızâ ve ihtiyârımla mezbûre Emine Hatun’a ferâğ ve kasr-ı yed edip atik berât ve tezkiresini dahi yedine teslîm eylediğimde ol dahi bedel-i ferâğ olmak üzere bana mâlından teberru‘an yüz yirmi guruş def‘ ve teslîm ve ben dahi yedinden ahz ü kabz ve umûruma sarfla istihlâk eylediğimden sonra ben vazîfe-i mezkûreye müte‘allika âmme-i de‘âvî ve kâffe-i mutâlebâtdan mezbûre Emine Hatun’un zimmetini ibrâ ve ıskāt eylediğimde ol dahi bedel-i ferâğ nâmıyla bana medfû‘u olan meblağ-ı müstehlek-i mezbûr yüz yirmi guruşa müte‘allika âmme-i da‘vâdan benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’l-mu‘teberi’ş-şer‘î mâ-vaka‘a. Fî 9 min-Zilka‘de sene 1196 Şühûdü’l-hâl: Mehmed Ağa b. Ali, Yahya Beşe b. Hasan, Mustafa b. Mustafa, Molla Ali b. Halil, Hacı Hasan b. Osman.