Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 123 Hüküm no: 67 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerâğî Hasan mahallesinden Bedredine bt. Dakes’in vârislerinin tereke konusunda birbirlerinin zimmetlerini ibra etmeleri Mîrâsdan ibrâ Mahmiye-i İslâmbol’da Çerâğī Hasan mahallesinde mütemekkine iken bundan akdem hâlike olan Bedredine? bt. Dakes nâm Nasrâniyenin verâseti zevc-i metrûkü Haçador v. Mardoros nâm zimmî ile li-ebeveyn kız karındaşı Kaya bt. el-mersûm Dakes nâm Nasrâniyeye münhasıra ve terekesi bi’l-münâsafa merkūmâna isâbeti lede’ş-şer‘i’l-enver zâhir ve mütehakkık oldukdan sonra mersûme Kaya Nasrâniye meclis-i şerîf-i enverde tereke-i hâlike-i merkūmeye bi’l-verâse vâzı‘ü’l-yed olan işbu hâmilü’r-rakīm merkūm Haçador zimmî muvâcehesinde ikrâr ve takrîr-i kelâm edip mûrisem hâlike-i mersûmenin terekesine zevci merkūm Haçador zimmî bi’l-verâse vâzı‘ü’l-yed olmağla tereke-i hâlike-i merkūmeden i‘tibâr-ı merkūm üzere isâbet eden hisse-i irsiye-i ma‘lûmemi zevci merkūm Haçador zimmîden bu esnâda taleb ve da‘vâya tesaddî eylediğimde beynimizde münâza‘a vâki‘ olmuşdu. El-hâletü hâzihî beynimize muslihûn tavassutuyla ber-vech-i muharrer tesaddî eylediğim da‘vâ-yı mezkûremden meccânen fâriğ olup mûrisem hâlike-i mersûmenin kalîl ü kesîr ve celîl ü hakīr ism-i mâl ıtlâk olunur mecmû‘-ı terekesine ve bi’l-cümle hukūk-ı mîrâsa müte‘allika âmme-i de‘âvî ve kâffe-i mutâlebâtdan ben merkūm Haçador zimmînin zimmetini ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 5 min-Zilka‘deti’ş-şerîfe sene 1196 Şühûdü’l-hâl: İmâm Abdullah Efendi b. İbrahim, Müezzin es-Seyyid Osman b. Abdurrahim, İpekçi es-Seyyid Hasan b. Ali, Müezzin Molla Ahmed b. Mehmed, Takyeci Hüseyin b. Mustafa, Molla Ali b. Halil ve gayruhum.