Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 124 Hüküm no: 68 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Hadice bt. Mehmed’in kendisini boşayan kocasından mehrini alarak zimmetini ibra etmesi Tatlîk Mahmiye-i İslâmbol’da Ali Fakih mahallesinde sâkine ve zâtı vech-i şer‘î üzere mu‘arrefe olan Hadice bt. Mehmed nâm hatun meclis-i şer‘-i şerîf-i enverde zevc-i mutallıkı işbu bâ‘isü’l-vesîka Mehmed Beşe b. Abdurrahman nâm kimesne mahzarında ikrâr ve takrîr-i kelâm edip ben mezbûr Mehmed Beşe’nin yirmi guruş mehr-i müeccel tesmiyesiyle zevce-i medhûlün-bihâsı ve zevcim mezbûrun firâşından hâsıl hamlim olduğu hâlde târih-i kitâb günü beni tatlîk, zimmetinde ma‘kūdun-aleyh olan mehr-i müeccel-i mezkûr yirmi guruş hakkımı zevc-i mutallıkım mezbûr Mehmed Beşe işbu meclis-i şer‘de bana def‘ ü teslîm ve ben dahi yedinden tamamen ahz ü kabz edip nafaka-i hamlimden mâ‘adâ hukūk-ı zevciyete müte‘allika âmme-i de‘âvî ve kâffe-i mutâlebâtdan zevc-i mutallıkım mezbûr Mehmed Beşe’nin zimmetini ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 12 Zilka‘de sene 1196 Şühûdü’l-hâl: Molla Ali b. Halil, Salih b. Halil, Hacı Hasan b. Osman, Mustafa b. Mustafa.