Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 124 Hüküm no: 69 Orijinal metin no: [10a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Hadice bt. Mehmed’in kendisini boşayan kocasından nafaka alması Ve hammaliyesi: 4 Mahmiye-i İslâmbol’da Ali Fakih mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-kitâb Hadice bt. Mehmed nâm hatun meclis-i şer‘-i şerîf-i enverde zevc-i mutallıkı Mehmed Beşe b. Abdurrahman mahzarında takrîr-i kelâm ve bast-ı merâm edip zevc-i mutallıkım mezbûrun firâşından hâsıl hamlim olmağla vaz‘-ı haml ile iddetim münkaziye oluncaya değin nafaka-i iddet ve meûnet-i süknâm içün zevc-i mutallıkım mezbûr Mehmed Beşe üzerine kıbel-i şer‘den kadr-ı ma‘rûf meblağ farz ve takdîr olunmak matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi mezbûre Hadice Hatun’un vaz‘-ı haml ile iddeti münkaziye oluncaya [değin] nafaka ve meûnet-i süknâsı içün zevc-i mutallıkı mezbûr Mehmed Beşe üzerine bi’t-terâzî târih-i kitâbdan küllü yevm dörder para farz ve takdîr buyurup meblağ-ı mefrûz-ı mezkûru mezbûre Hadice Hatun kendi nafaka ve kisvesine harc ü sarfa ve vakt-i zarûretde istidâneye ve inde’z-zafer zevc-i mutallıkı mezbûr Mehmed Beşe üzerine rücû‘a mezbûre Hadice Hatun’a izin vermeğin mâ-vaka‘a. Fî 12 Zilka‘de sene 1196 Şühûdü’l-hâl: Şâhidûn-ı sâbıkūn.