Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 125 Hüküm no: 70 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evliya mahallesinden Havva bt. Mehmed’in evini Halil b. Yusuf’a satması Menzil mübâya‘ası Mahmiye-i İslâmbol’da Mevlevîhâne Yenikapısı dâhilinde el-Hâc Evliyâ mahallesinde sâkine ve zâtı ta‘rîf-i şer‘î ile mu‘arrefe olan Havva bt. Mehmed nâm hatun meclis-i şer‘-i şerîf-i enverde işbu bâ‘isü’l-kitâb Halil b. Yusuf mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülküm olup mahalle-i mezbûrede vâki‘ bir tarafdan Sıvacı Mehmed Beşe menzili ve bir tarafdan Mustafa Beşe menzili ve bir tarafdan kasab Mehmed Beşe menzili ve bir tarafdan tarîk-i âm ile mahdûd tahtânî iki bâb oda ve bi’r-i mâ ve kenîf ve bir mikdâr bağçeyi müştemil bir bâb mülk menzilimi cümle tevâbi‘ ve levâhıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Halil Beşe’ye yüz elli guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz elli guruşu mezbûr Halil Beşe yedinden ahz ü kabz eyledim, ba‘de’l-yevm menzil-i mahdûd-ı mezkûr cemî‘ müştemilâtıyla mezbûr Halil Beşe’nin mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 10 Zilka‘de sene 1196 Şühûdü’l-hâl: Kapıcı Seyyid Ahmed Beşe b. Salih, Hacı Hüseyin, Mustafa b. Mustafa, Salih b. Halil, Molla Ali b. Halil.