Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 127 Hüküm no: 73 Orijinal metin no: [10b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Praşkova v. Ananya’nın Niğde kazası Dilmason köyündeki evini Dimitri v. Anaştaş’a satması Mübâya‘a-i menzil Vilâyet-i Anadolu’da Niğde kazâsına tâbi‘ Dilmason nâm karye ahâlisinden olup mahmiye-i İslâmbol’da Yedikule hâricinde bostanda mütemekkin Praşkova v. Ananya nâm zimmî meclis-i şer‘-i şerîf-i enverde işbu hâmilü’r-rakīm Dimitri v. Anaştaş nâm zimmî muvâcehesinde ikrâr ve takrîr-i kelâm edip karye-i mezbûrede vâki‘ bir tarafdan Dürrüoğlu menzili ve bir tarafdan Yeratmoz zimmî menzili ve bir tarafdan Kapuoğlu menzili ve bir tarafdan tarîk-i âm ile mahdûd fevkānî iki bâb oda ve tahtında yedi göz kemeri müştemil bir bâb mülk menzilimi cümle tevâbi‘ ve levâhıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Dimitri zimmîye kırk beş guruşa bey‘ ve temlik ve mahâllinde kabza taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr kırk beş guruşu merkūm Dimitri zimmî yedinden tamamen ahz ü kabz eyledim, ba‘de’l-yevm menzil-i mahdûd-ı mezkûr merkūm Dimitri zimmînin mülk-i müşterâsı ve hakk-ı sarfı olup benim kat‘a alâka ve medhalim kalmamışdır, mahâllinde mutasarrıf olsun dedikde gıbbe’t-tasdîki’ş-şer‘î mâ-vaka‘a. Fî 13 Zilka‘de sene 1196 Şühûdü’l-hâl: Molla Ali b. Halil, Ömer Beşe b. Musli, Hüseyin b. Ali, Mustafa b. Mustafa, Yorgi v. Praşkova, Kostandi v. Yeratmoz, Hıristo v. Yeni, Praşkova v. Yasef.