Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 127 Hüküm no: 74 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Pîrî mahallesinden Hadice bt. Abdullah’ın kocasından daha önce boşandığının tespiti İstihbâr-ı tatlîk Mahmiye-i İslâmbol’da Hacı Pîrî mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-kitâb Hadice bt. Abdullah nâm hatundan ber-vech-i âtî istihbâr-ı şer‘î sudûrundan sonra udûl-ı ahrâr-ı ricâl-i Müslimînden mahmiye-i mezbûrede Koca Mustafa Paşa kurbünde Canbaziye mahallesinde sâkin Molla Ali b. Halil ve Ali Fakih mahallesinde sâkin Ali Ağa b. Mustafa nâm kimesneler zât-ı müstahbireyi ârifân oldukları hâlde li-ecli’l-ihbâr meclis-i şer‘a hâzırân olup istişhâd olunduklarında fi’l-hakīka işbu müstahbire-i mezbûre Hadice Hatun’un zevci gāib ani’l-mescid Mehmed b. Abdullah nâm kimesne işbu sene-i mübâreke Şa‘bâni’l-mu‘azzamının yirmi yedinci günü zevcesi mezbûre Hadice Hatun ile bizim huzûrumuzda muhâla‘a-i sahîha-i şer‘iye ile muhâla‘a ve hukūk-ı zevciyetden herbiri âharın zimmetini ibrâ ve ıskāt ve herbiri âharın ibrâsını kabûl ve ol-vechile mezbûre Hadice Hatun târih-i mezbûrdan beri zevci gāib-i mezbûrdan mutallakadır, biz bu husûsa bu vech üzere şâhidleriz ve inde’l-hasm şehâdet dahi ederiz deyü herbiri meclis-i şer‘de alâ-tarîki’ş-şehâde haber verdiklerinden sonra mezbûre Hadice Hatun zât-ı hayz olmağla târih-i mezbûrdan târih-i kitâba gelince yetmiş altı gün mürûr ve müddet-i mezkûrede üç def‘a dem-i hayz-ı kevâmil görüp gāib-i mezbûrdan iddeti münkaziye olduğuna mezbûre Hadice Hatun tahlîf-i şer‘î olunup rızâsıyla nefsini zevc-i âhara tezvîce izin verilmeğin mâ-vaka‘a bi’t-taleb. Fî 13 Zilka‘de sene 1196 Şühûdü’l-hâl: el-Hâc Hasan b. Osman, Ali Ağa b. Mustafa, Molla Ali b. Halil.