Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 128 Hüküm no: 75 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Davudpaşa mahallesinde Abdurrahim Ağa tarafından vakfedilen ve Mustafa Efendi ile hanımı Emine’nin tasarrufunda olan evin yanmasıyla ev arsasının aynı kişilere kiraya verilmesi İstihkâm hücceti Mahmiye-i İslâmbol’da Davudpaşa mahallesinde vâki‘ etrâf-ı erba‘ası medrese ve Kalaycı es-Seyyid İbrahim ve ba‘zan es-Seyyid Osman ve ba‘zan Hadice Hatun ve ba‘zan Kalaycı Mustafa menzil arsaları ve tarîk-i hâs ile mahdûd ma‘lûmü’l-müştemilât bir bâb menzilin vâkıfı ve bi’l-meşrûta mütevellîsi Abdurrahim Ağa b. Abdullah meclis-i şer‘-i hatîr-i lâzımü’t-tevkīrde menzil-i mezkûrun senevî üç yüz altmış akçe icâre-i müeccele ve mu‘acccele-i ma‘lûme ile bi’l-münâsafe mutasarrıfları işbu bâ‘iseyü’l-vesîka kendi nefsinden asîl ve zevcesi Emine bt. Ali nâm hatun tarafından tasdîka vekîl olduğu ber-nehc-i şer‘î sâbit olan Mustafa Efendi b. İbrahim mahzarında bi’t-tevliye takrîr-i kelâm ve bast-ı merâm edip mütevellîsi olduğum menzil-i mahdûd-ı mezkûr bundan akdem vâki‘ olan harîkde bi’l-külliye muhterik olup arsa-i sırfa kalmağla arsa-i mezkûre üzerine vakıf içün icâre-i mu‘accelesine mahsûben müceddeden binâya mezbûrân Mustafa Efendi ve zevcesi Emine Hatun ve âharı rağbet etmeyip ve cânib-i vakfda dahi binâya müsâ‘ade olmamağın arsa-i mezkûre senevî üç yüz altmış akçe icâre-i müeccele-i kadîmesiyle üzerine ihdâs olunan binâ bânîsinin mülkü olmak üzere izin verilmek cânib-i vakfa evlâ ve enfa‘ olduğu zeyl-i kitâbda muharrerü’l-esâmî Müslimîn ihbârlarıyla zâhir ve ben bi’t-tevliye mezûn olduğumdan sonra ben dahi taraf-ı vakıfdan bi’t-tevliye mezbûrân Mustafa Efendi ve zevcesi Emine Hatun yedlerine müceddeden i‘tâ eylediğim bir kıt‘a temessük mantûkunca arsa-i mahdûde-i mezkûreyi beher şehr otuz akçe icâre-i müeccele-i kadîmesiyle mezbûr Mustafa Efendi’ye bi’t-tevliye îcâr ve teslîm edip arsa-i mezkûre üzerine mâllarıyla ihdâs eylediği binâ mülkü olmak üzere bi’t-tevliye izin verdiğimde onlar dahi ber-vech-i muharrer istîcâr ve tesellüm ve kabûl etmekle ber-vech-i muharrer mezbûrân Mustafa Efendi ve zevcesi Emine Hatun arsa-i mezkûre üzerine mâlıyla her [ne] binâ ihdâs eder ise kendi mülkü olmak üzere bi’t-tevliye izin verdiğime binâen kıbel-i şer‘den dahi mezbûr Mustafa Efendi yedine bir kıt‘a hüccet i‘tâ olunmak bi’t-tevliye matlûbumdur dedikde hakīkat-i hâl minvâl-i meşrûh üzere olduğunu Müslimûn-ı merkūmûn ihbâr ve mezbûr Mustafa Efendi dahi bi’l-asâle ve bi’l-vekâle tasdîk etmeğin ber-mantûk-ı temessük-i mütevellî-i mezbûr arsa-i mahdûde-i mezkûra beher şehr otuz akçe icâre-i müeccele ile üzerine her ne binâ ihdâs eder ise mülkü olmak üzere mezbûrân Mustafa Efendi ve zevcesi Emine Hatun yedlerine li-ecli’l-istihkâm işbu vesîka-i enîka ketb u tahrîr ve imlâ olundu. Fî 7 Zilka‘de sene 1196 Şühûdü’l-hâl: el-Hâc Abdullah b. Abdullah, Mustafa Ağa b. Ali, Mehmed Salih Efendi b. Ali, Ömer Efendi b. ( ), Çukadâr Ali Ağa b. Mehmed, Numan Efendi b. Süleyman, Molla Ali b. Halil, Salih b. Halil, Hacı Hasan b. Osman, Mustafa b. Mustafa ve gayruhum.