Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 129 Hüküm no: 76 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraç Doğan mahallesinden Kaftânî Mehmed Çavuş’un evini arsasıyla birlikte İbrahim Efendi’ye satması Mübâya‘a-i menzil Mahmiye-i İslâmbol’da Ma‘cûnî kurbünde Sarrâc Doğan mahallesinde sâkin sipâh ocağı çavuşlarından Kaftânî Mehmed Çavuş Ağa b. el-Hâc Mustafa meclis-i şer‘-i hatîr-i lâzımü’t-tevkīrde Dergâh-ı âlî -dâme mahfûfen bi’l-me‘âlî- yeniçerileri ocağı miyân yazıcılarından mefharü’l-emâsil ve’l-akrân işbu sâhibü’l-kitâbi’l-müstetâb İbrahim Efendi b. Yusuf tarafından vech-i âtî üzere tasdîka vekîl olduğu Mehmed Çavuş Ağa b. Osman ve İbrahim Çavuş Ağa b. Halil nâm kimesneler şehâdetleriyle sâbit olan diğer İbrahim Ağa b. İsmail nâm kimesne mahzarında bi-tav‘ihî ikrâr-ı tam ve takrîr-i kelâm edip mahalle-i mezbûrede vâki‘ bir tarafdan Süleyman Çavuş menzili ve bir tarafdan es-Seyyid Veli Beşe menzili ve bir tarafdan Himmetzâde odaları ve bir tarafdan tarîk-i âm ile mahdûd hâriciyede fevkānî üç bâb oda ve bir sofa ve dîvânhâne ve âbdesthâne ve kenîf ve tahtânî bir kahve odası ve bir çukadâr odası ve dehliz ve ahur ve samanhâne ve anbar ve bi’r-i mâ ve eşcâr-ı müsmire ve gayr-ı müsmireli bağçe ve derûn-ı bağçede bir köşk ve bir fıskiyeli havuz ve bir mikdâr havlu ve dâhiliyede dört bâb oda ve bir sofa ve dîvânhâne ve âbdesthâne ve kenîf ve tahtânî iki bâb oda ve dîvânhâne ve âbdesthâne ve kenîf ve kârgîr matbah ve bir hamam ve câmekân odası ve kilâr ve mahtab ve kömürlük ve bir mikdâr havluyu müştemil bir bâb menzilin mârrü’z-zikr bağçe tarafından dokuz yüz seksen yedi buçuk zirâ‘ arsası merhûm Fenâyî Dede Vakfı’na beher şehr on beş akçe mukāta‘alı ve mâ‘adâ bi’l-cümle arsa ve ebniye-i mezkûre ve müştemilât-ı sâire-i ma‘lûmesi akd-i âti’z-zikrin sudûruna değin bâ-hüccet-i şer‘iye yedimde mülk ve hakkım olmağla ben menzil-i mahdûd-ı mezkûrun mülk olan bi’l-cümle arsa ve ebniye-i mezkûre ve müştemilât-ı sâire-i ma‘lûmesini cümle tevâbi‘ ve levâhıkıyla tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müvekkil-i mûmâ-ileyh İbrahim Efendi’ye yedi bin iki yüz elli guruşa bey‘ ve temlik ve teslîm ve mukāta‘alı arsa-i mezkûresini dahi bâ-ma‘rifet-i mütevellî meccânen ferâğ ve tefvîz eylediğimde müvekkil-i mûmâ-ileyh İbrahim Efendi dahi ber-vech-i muharrer iştirâ ve temellük ve tesellüm ve tefevvüz ve kabûl eyledikden sonra semeni olan meblağ-ı merkūm yedi bin iki yüz elli guruşu müvekkil-i mûmâ-ileyh İbrahim Efendi yedinden tamamen ve kâmilen ahz ü kabz edip mebî‘-i mezkûrun gabn ve tağrîrine müte‘allika âmme-i de‘âvîden dahi müvekkil-i mûmâ-ileyh İbrahim Efendi’nin zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm menzil-i mahdûd-ı mezkûrda benim aslâ alâka ve medhalim kalmayıp müvekkil-i mûmâ-ileyh İbrahim Efendi’nin mülk-i müşterâsı ve dâhil-i havza-i tasarrufu olmuşdur, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a. Fî 15 Zilka‘de sene 1196 Şühûdü’l-hâl: Halil Efendi b. Piyâde, Mehmed Said Efendi b. Piyâde, Ebûbekir Ağa Serturnâyi, İbrahim Çavuş Ağa, es-Seyyid Osman Ağa Serturnâyi, Mehmed Çavuş Ağa b. Osman, İbrahim Çavuş Ağa b. Halil, Molla Ali b. Halil, el-Hâc Hasan b. Osman.