Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 299 Hüküm no: 311 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan mahallesinden Ahmed Ağa’nın vefat eden Ahmed b. Ömer’in kızları aleyhine açtığı davada sulh olması İstifâ-i bedel sulh ve ibrâsı Mahmiye-i İslâmbol’da Eğrikapı dâhilinde Sultan mahallesinde sâkin Ahmed Ağa b. Mehmed nâm kimesne meclis-i şer‘-i şerîf-i enverde işbu sâhibâtü’l-kitâb Âişe ve Zeliha bintey Ahmed nâm hatunlar ile Emine bt. el-mezbûre Ahmed nâm sagīrenin vâlidesi ve tesviye-i umûrunu rü’yete kıbel-i şer‘den bâ-hüccet-i şer‘iye vasîyy-i mansûbesi Fatıma bt. ( ) nâm hatun taraflarından husûs-ı âti’l-beyânda vekîlleri olduğu zât-ı mezbûrâtı ârifân Molla Ali b. Halil ve Mustafa b. Mustafa nâm kimesneler şehâdetleriyle şer‘an sâbit olan mezbûrât Âişe ve Zeliha ve Emine’nin üveyi babaları ve mezbûre Fatıma Hatun’un hâlâ zevci Abdülbâki Ağa b. Ali mahzarında ikrâr ve takrîr-i kelâm edip sâbıkā Kâtib-i ser-bevvâbîn-i şehriyârî merhûm Hüseyin Efendi Vakfı müsakkafâtından olup mahmiye-i mezbûrede Davudpaşa mahallesinde vâki‘ beher şehr onar akçe icâre-i müecceleli bir bâb attâr dükkânının üç sehm i‘tibârıyla iki sehmi müvekkiletân-ı mezbûretân Âişe ve Zeliha hatunlara ve bir sehmi dahi müvekkile-i mezbûre Fatıma Hatun’un vasîsi olduğu sagīre-i mezbûre Emine’ye babaları müteveffâ Ahmed b. Ömer’den müntakil taht-ı tasarruflarında olduğu hâlde bundan akdem mezbûretân Âişe ve Zeliha hatunlar asâleten ve sagīre-i mezbûrenin zikr olunan dükkândan hissesini bedel-i misli ile âhara ferâğ ve kabz-ı bedele vâlidesi vasîyy-i müvekkile-i mezbûre kıbel-i şer‘den bâ-hüccet-i şer‘iye mezûne olmağla vesâyeten zikr olunan dükkânı iki yüz guruş bedel-i makbûz mukābelesinde mütevellîsi işbu hâzır bi’l-meclis Mehmed Said Efendi b. Ali ma‘rifetiyle herbiri bana ferâğ ve tefvîz eylediklerinde ben dahi ber-vech-i muharrer tefevvüz ve kabûl eylediğimden sonra bedel-i merkūmu istifâ etmeden dükkân-ı mezbûr zaman-ı kalîlde muhterik olup arsası sırfa kalmağla ben arsa-i mezkûreden kasr-ı yed ve bedel-i merkūmu müvekkilât-ı mezbûrât Âişe ve Zeliha ve Fatıma hatunlardan bu esnâda taleb ve da‘vâya tesaddî etmişidim. El-hâletü hâzihî beynimize muslihûn tavassutuyla tesaddî eylediğim da‘vâ-yı mezkûremden müvekkilât-ı mezbûrât ile beni otuz guruş üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh meblağ-ı mezbûr otuz guruşu işbu vekîl-i mezbûr Abdülbâki Ağa yedinden tamamen ahz ü kabz edip dükkân-ı mezkûrun bedeline ve bi’l-cümle husûs-ı mezkûra müte‘allika âmme-i de‘âvî ve kâffe-i mutâlebâtdan müvekkilât-ı mezbûrât Âişe ve Zeliha ve Fatıma hatunlardan herbirinin zimmetlerini ibrâ ve ıskāt eylediğimde mezbûr Abdülbâki Ağa dahi bi’l-vekâle ibrâmı kabûl eyledi dedikde gıbbe’t-tasdîki’ş-şer‘î. Fî 25 Ra sene 1197 Şühûdü’l-hâl: Hafız İbrahim Efendi b. Hasan, Ali Efendi b. Osman, Hidayet Ağa b. Derviş Mehmed, Mustafa b. Mustafa, Molla Ali b. Halil.