Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 300 Hüküm no: 312 Orijinal metin no: [44b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahimpaşa mahallesinden Hanım bt. Abdullah’ın bazı eşyalarını Ali b. Hasan’a satması Eşyâ mübâya‘ası Mahmiye-i İslâmbol’da Silivrikapısı dâhilinde İbrahim Paşa mahallesinde sâkine ve zâtı vech-i şer‘î üzere mu‘arrefe olan Hanım bt. Abdullah nâm hatun meclis-i şer‘-i enverde işbu bâ‘isü’l-vesîka es-Seyyid Ali b. Hasan nâm kimesne mahzarında ikrâr ve takrîr-i kelâm edip yedimde mâlım ve mülküm olan bir minder, iki köhne çit yorgan bâ-çârşeb ve bir baş yasdığı ve bir köhne çit mak‘ad ve bir çuka ferâce ve bir yaşmak ma‘a makrame ve bir bez gömlek ve bir bogasi entarimi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûr es-Seyyid Ali’ye sekiz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr sekiz guruş mutâlebesinden mezbûr es-Seyyid Ali’nin zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm eşyâ-i muharrere-i mezkûre mezbûr es-Seyyid Ali’nin mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe. Fî 28 min-Ra sene 1197 Şühûdü’l-hâl: İmâm Ömer Efendi b. ( ), Molla Abdi Müezzin b. ( ), Molla Ali b. Halil, Kirişçi Hacı Paşa, Salih b. Halil, Kirişçi Molla Ali b. el-Hâc Ahmed.