Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 301 Hüküm no: 313 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mimaracem mahallesinden Ayşe bt. Ömer’in daha önceden kocası tarafından boşanmış olduğu İstihbâr-ı tatlîk Mahmiye-i İslâmbol’da Mi‘mâr Acem mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-kitâb Âişe bt. Ömer nâm hatundan meclis-i şer‘de ber-vech-i âtî istihbâr-ı şer‘î sudûrundan sonra udûl-ı ahrâr-ı ricâl-i Müslimînden mahmiye-i mezbûrede Cafer Ağa mahallesinde sâkin es-Seyyid Numan Beşe b. Mehmed Emin ve İskender Ağa mahallesinde sâkin Süleyman b. Osman nâm kimesneler zât-ı müstahbire-i mezbûreyi ârifân oldukları hâlde li-ecli’l-ihbâr meclis-i şer‘a hâzırân olup istihbâr olunduklarında fi’l-hakīka işbu müstahbire-i mezbûrenin zevci gāib ani’l-beled Hüseyin b. Abdullah nâm kimesne bin yüz doksan altı senesi Şa‘bâni’l-mu‘azzamının sekizinci günü mahmiye-i mezbûrede Salmatomruk kurbünde vâki‘ menzilinde bizim huzûrumuzda zevcem mezbûre Âişe benden boş olsun deyü tatlîk ve bizi işhâd ve ol-vechile müstahbire-i mezbûre Âişe Hatun târih-i mezbûrdan beri zevci gāib-i mezbûr Hüseyin’den mübâne olmuşdur, biz bu husûsa bu vech üzere şâhidleriz, şehâdet dahi ederiz deyü herbiri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb. Fî 28 Ra sene 1197 Şühûdü’l-hâl: Es-Seyyid Numan Beşe b. Mehmed Emin, Süleyman b. Osman, Molla Ali b. Halil, Hacı Hasan b. Osman.