Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 302 Hüküm no: 314 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed mahallesinden Fatma Hatun’un bakmakta olduğu küçük kızı için boşandığı kocasından nafaka alması Nafaka-i sagīr Mahmiye-i İslâmbol’da Cerrâh Mehmed Paşa Câmi‘-i şerîfi kurbünde el-Hâc Ahmed mahallesinde sâkine işbu bâ‘isetü’l-kitâb Fatıma nâm hatunun babası ve tarafından husûs-ı âti’l-beyânda vekîl olduğu zât-ı mezbûreyi ârifân Ali b. Ali ve İbrahim b. Veliyüddin nâm kimesneler şehâdetleriyle şer‘an sâbit olan Bostânî Mustafa b. Ebîbekir nâm kimesne meclis-i şer‘-i şerîf-i enverde müvekkile-i mezbûrenin zevc-i mutallıkı Hafız Ahmed b. Mehmed nâm kimesne mahzarında bi’l-vekâle takrîr-i kelâm ve bast-ı merâm edip mezbûr Hafız Ahmed’in firâşından hâsıla ve kızım müvekkile-i mezbûreden mütevellide ve bi-hakkı’l-hıdâne hâlâ hacr u terbiyesinde olan sadriye kızı Azime nâm sagīrenin mâlı olmayıp nafaka ve kisveye ihtiyâcı olmağla sagīre-i mezbûrenin nafaka ve kisve-bahâsı içün babası mezbûr Hafız Ahmed üzerine kıbel-i şer‘den kadr-ı ma‘rûf meblağ farz ve takdîr olunmak kızım müvekkile-i mezbûre Fatıma Hatun’un bi’l-hıdâne matlûbudur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsn-meâb- efendi hazretleri dahi sagīre-i mezbûrenin ber-vech-i muharrer nafaka ve kisve-bahâsı içün babası mezbûr Hafız Ahmed üzerine bi’t-terâzî târih-i kitâbdan küllü yevm beş para farz ve takdîr edip meblağ-ı mefrûz-ı mezkûru sagīre-i mezbûrenin nafaka ve kisvesine harc ü sarfa ve lede’l-iktizâ istidâneye ve inde’z-zafer babası mezbûr Hafız Ahmed üzerine rücû‘a müvekkile-i mezbûre Fatıma Hatun’a izin vermeğin mâ-vaka‘a bi’t-taleb. Fî 27 min-Ra sene 1197 Şühûdü’l-hâl: Ali b. Ali, İbrahim b. Veliyüddin, Ahmed Beşe b. Abdullah, Hacı Hasan b. Osman, Molla Ali b. Halil ve gayruhum.