Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 302 Hüküm no: 315 Orijinal metin no: [45a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Melek Hatun mahallesinden Rukiye Hatun’un damadı Mehmed Said Beşe aleyhine açtığı alacak davasından feragat etmesi İbrâ Mahmiye-i İslâmbol’da Melek Hatun mahallesinde sâkine ve zâtı vech-i şer‘î üzere mu‘arrefe olan Rukiye bt. ( ) nâm hatun meclis-i şer‘-i şerîf-i enverde dâmâdı işbu bâ‘isü’l-kitâb Mehmed Said Beşe b. Mustafa nâm kimesne mahzarında ikrâr ve takrîr-i kelâm edip bundan akdem dâmâdım mezbûr Mehmed Said Beşe’nin emriyle zevcesi kızım Şerife Emetullah bt. Mustafa nâm hatunun nafakasına üç senede yetmiş iki guruş masrûfum olup meblağ-ı masrûf-ı mezkûru bu esnâda dâmâdım mezbûrdan taleb ve da‘vâya tesaddî etmişidim. El-hâletü hâzihî beynimize muslihûn tavassutuyla ber-vech-i muharrer tesaddî eylediğim da‘vâ-yı mezkûremden meccânen fâriğa olup meblağ-ı mezbûra müte‘allika âmme-i de‘âvî ve kâffe-i mutâlebâtdan dâmâdım mezbûr Mehmed Said Beşe’nin zimmetini ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîki’ş-şer‘î. Fî 27 Ra sene 1197 Şühûdü’l-hâl: Es-Seyyid Ubeydullah b. es-Seyyid el-Hâc Mehmed, es-Seyyid Mustafa İmâm, İbrahim Efendi b. eş-Şeyh Osman İmâm, Mehmed Beşe Lüleci, Molla Ali b. Halil.