Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 306 Hüküm no: 319 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kütahya’nın Meydan mahallesinden Mustafa b. Abdurrahman’ın Silahdar Ocağı’ndaki esamesini Bostancı Ahmed Ağa’ya devretmesi Esâme, meccânen Vilâyet-i Anadolu’da medîne-i Kütahya mahallâtından Meydan mahallesi ahâlisinden olup mahmiye-i İslâmbol’da ( ) mahallesinde müsâfiren sâkin Mustafa b. Abdurrahman nâm kimesne meclis-i şer‘-i şerîf-i enverde yeğeni işbu bâ‘isü’l-kitâb Bostânî el-Hâc Ahmed Ağa b. Ali nâm kimesne mahzarında ikrâr ve takrîr-i kelâm edip benim Silahdâr Ocağı’nda yirmi sekizinci bölükde Mustafa Abdurrahman Kütahya ismiyle mutasarrıf olduğum yevmî on akçe esâmîmi bundan akdem kendi hüsn-i rızâ ve ihtiyârımla mezbûr el-Hâc Ahmed Ağa’ya meccânen ferâğ ve bi’l-külliye kasr-ı yed edip ibtidâ ta‘bîr olunur tezkiresini yedine teslîm eylediğimden sonra ben esâmî-i mezkûra müte‘allika âmme-i de‘âvî ve kâffe-i mutâlebâtdan mezbûr el-Hâc Ahmed Ağa’nın zimmetini ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîki’l-mu‘teberi’l-mer‘î mâ-vaka‘a. Fî 29 Ra sene 1197 Şühûdü’l-hâl: Mustafa Ağa b. Ahmed Efendi, Mehmed Ağa b. Abdünnebi, Molla Mehmed b. Mustafa, Molla Ali b. Halil, Salih b. Halil.