Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 306 Hüküm no: 320 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karagöz mahallesinden Zeyneb bt. Abdullah’ın bazı eşyalarını Mükrime Hatun’a satması Eşyâ mübâya‘ası Mahmiye-i İslâmbol’da Şehzâde Câmi‘-i şerîfi kurbünde Karagöz mahallesinde sâkine Zeyneb bt. Abdullah nâm hatun tarafından ber-vech-i âtî ikrâra vekîl olduğu zât-ı mezbûreyi ârifân es-Seyyid Molla Ahmed b. Ömer ve Ahmed b. Ömer nâm kimesneler şehâdetleriyle şer‘an sâbit olan Osman Ağa b. Mehmed nâm kimesne meclis-i şer‘-i şerîf-i enverde mu‘arrefetü’z-zât işbu bâ‘isetü’l-kitâb Mükrime Hatun bt. Abdullah mahzarında bi’l-vekâle ikrâr ve takrîr-i kelâm edip müvekkilem mezbûre Zeyneb Hatun eşyâ-i memlûkesinden iki müsta‘mel şali entari ve bir Mağrib şali entari ve şaliye kaplı bir sincab kürkü ve keremsûda kaplı bir zerdeva kürkü ve üç bez gömlek ve iki bez don ve iki çit yorgan bâ-çârşeb ve bir çiçekli entari ve bir çârşeb ve bir çuka ferâce ve bir hamam takımı ve üç çit boğça ve iki sepet sandığını târih-i kitâbdan on dört ay mukaddem tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûre Mükrime Hatun’a otuz guruşa bey‘ ve temlik ve teslîm eylediğinde ol dahi târih-i mezbûrda ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr otuz guruş mütâlebesinden müvekkilem mezbûre Zeyneb Hatun mezbûre Mükrime Hatun’un yine târih-i mezbûrda zimmetini ibrâ ve ıskāt eylediğinde ol dahi ibrâsını kabûl edip ol-vechile eşyâ-i muharrere-i mezkûre târih-i mezbûrdan beri mezbûre Mükrime Hatun’un mülk-i müşterâsı ve hakk-ı sarfı olup müvekkilem mezbûre Zeyneb Hatun’un kat‘a alâka ve medhali kalmamışdır dedikde gıbbe. Fî-gurreti şehri Rebî‘ülâhir sene [1]197 Şühûdü’l-hâl: el-Hâc Mustafa b. Veliyüddin, Salih b. Halil, Ömer Ağa b. Ahmed, es-Seyyid Molla Ahmed b. Ömer, Molla Ali b. Halil, Ahmed b. Ömer, Mehmed Said b. Mustafa, Mehmed b. Hüseyin, Ahmed b. Mehmed ve gayruhum.