Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 307 Hüküm no: 321 Orijinal metin no: [46a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise bt. Mehmed’in evinin bir odasında kaldığı Haraç Kalemi kisedarı İbrahim Efendi’ye bilezik ve saatini hibe etmesi ve bazı eşyalarını da satması Husûs ile mübâya‘a Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverden irsâl olunan Mevlana Hafız Numan Efendi b. Süleyman mahmiye-i İslâmbol’da Koca Mustafa Paşa mahallesinde kâin hâlâ Haraç Kalemi kîsedârı umdetü erbâbi’t-tahrîr ve’l-kalem zübdetü ashâbi’t-tastîr ve’r-rakam sa‘âdetlü İbrahim Efendi b. Abdi Efendi’nin sa‘âdet-hânelerine varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî eyledikde menzil-i mezkûrda sâkine ve zât-ı Müslimûn-ı merkūmûn ta‘rîfleriyle mu‘arrefe olan Nefise bt. Mehmed nâm hatun meclis-i ma‘kūd-ı mezkûrda bâ‘isü hâze’l-kitâbi’l-müstetâb mûmâ-ileyh İbrahim Efendi tarafından husûs-ı âti’l-beyânı tasdîka vekîl olduğu ber-nehc-i şer‘î sâbit olan Ömer Ağa b. Mehmed nâm kimesne mahzarında ikrâr ve takrîr-i kelâm edip ben müsinne ve alîle olup menzil-i mezkûrun bir odasında sâkine olmamla benim yedimde mâlım ve mülküm ancak on yedi miskāl bir çift altın bilezik ve bir altın pandül sâ‘at ile iki yemeni yorgan bâ-çârşeb ve bir şilte ve bir baş yasdığı ve bir yüz yasdığı ve iki şali entari ve bir keremsûda kaplı karsak kürk ve bir keremsûda kaplı nâfe kürk ve iki çuka ferâceye münhasıra olup bunlardan mâ‘adâ menzil-i mezkûrda mevcûd bisât-ı beyt ve evân-ı nühâsiye ve gayr-ı nühâsiye ve bi’l-cümle eşyâ-i sâire mûmâ-ileyhin mâlı olup benim kat‘a alâka ve medhalim olmamağın ben zikr olunan bir çift altın bilezik ve altın sâ‘atimi târih-i kitâbdan iki ay mukaddem hibe-i sahîha-i şer‘iye ile mûmâ-ileyh İbrahim Efendi’ye hibe ve temlik ve teslîm eylediğimde ol dahi ber-vech-i muharrer târih-i mezbûrda ittihâb ve temellük ve tesellüm ve kabz u kabûl eyledikden sonra eşyâ-i muharrere-i mezkûremi dahi yine târih-i mezbûrda tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile müvekkil-i mûmâ-ileyh İbrahim Efendi’ye otuz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr otuz guruş mutâlebesinden dahi müvekkil-i mûmâ-ileyhin zimmetini ibrâ ve ıskāt eylediğimde ol dahi ibrâmı kabûl etmeğin ol-vechile zikr olunan bilezik ve sâ‘at müvekkil-i mûmâ-ileyh İbrahim Efendi’nin mülk-i mevhûbu ve eşyâ-i muharrere-i mezkûre dahi mülk-i müşterâsı ve hakk-ı sarfı olup benim aslâ alâka ve medhalim kalmamışdır dedikde gıbbe’t-tasdîki’ş-şer‘î vâki‘ hâli mevlana-yı mezbûr mahâllinde ketb ü tahrîr, ba‘dehû mâ‘an ba‘s olunan Molla Ali b. Halil ile meclis-i şer‘a gelip alâ-vukū‘ıhî inhâ ve takrîr etmeğin mâ-vaka‘a bi’t-taleb. Fî-selhi Rebî‘ülevvel sene 1197 Şühûdü’l-hâl: eş-Şeyh Abdulkadir Efendi b. eş-Şeyh Ahmed Efendi, İsmail Efendi b. Veliyüddin, Ahmed Ağa b. Süleyman, Abdullah Ağa b. Abdullah, Mehmed Ağa b. Yahya, Molla Ali b. Halil, Yakub Ağa b. Ahmed, Arabacı Mehmed Emin b. Mehmed, Mehmed Emin Çavuş Ağa b. İbrahim.