Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 308 Hüküm no: 322 Orijinal metin no: [46a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mimaracem mahallesinden Zeyneb bt. Abdullah’ın kocasına mehrini hibe etmesi ve bazı eşyalarını da satması Eşyâ mübâya‘ası Mahmiye-i İslâmbol’da Mi‘mâr Acem mahallesinde sâkine Zeyneb bt. Abdullah nâm hatun tarafından vech-i âtî üzere vekîl olduğu zât-ı mezbûreyi ârifân Müezzin Molla Salih b. Mehmed ve İsmail b. Abdullah nâm kimesneler şehâdetleriyle şer‘an sâbit olan mahalle-i mezbûre imâmı Mehmed Efendi b. Halil meclis-i şer‘-i şerîf-i enverde müvekkile-i mezbûrenin hâlâ zevci işbu bâ‘isü’l-kitâb Halil Odabaşı b. Derviş Mehmed nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Zeyneb Hatun zevci mezbûr zimmetinde ma‘kūdun-aleyh olan on guruş mehr-i müeccelini hibetü’d-deyn mimmen aleyhi’d-deyn sahîhatün fehvâsınca zevci mezbûr Halil Odabaşı’ya hibe ve temlik eylediğinde ol dahi ber-vech-i muharrer ittihâb ve temellük ve kabûl eyledikden sonra eşyâ-i memlûkesinden bâ-defter-i müfredât yün memlû üç yemeni yasdık ve bir beledî döşek ve iki yorgan ma‘a çârşeb ve nısf beylik ve bir çuka ferâce ve bir entari ve bir bez gömlek ve bir tencere ma‘a kapak ve iki sahan ve bir kapak ve bir tâbe ve iki maşraba ve bir leğen ma‘a ibrik ve iki şamdan ve iki kahve ibriği ve bir hamam tası ve bir dolab ve bir hasır ve bir hamam takımını dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûr Halil Odabaşı’ya yirmi guruşa bey‘ [46b] ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi guruş mütâlebesinden zevci mezbûr Halil Odabaşı’nın zimmetini ibrâ-i âmm-ı sahîh-i şer‘î ile ibrâ ve ıskāt eylediğinde ol dahi ibrâsını kabûl etmeğin ol-vechile mehr-i mezkûr on guruşdan zevci mezbûr Halil Odabaşı’nın berî ve eşyâ-i muharrere-i mezkûre dahi mülk-i müşterâsı ve hakk-ı sarfı olup müvekkilem mezbûre Zeyneb Hatun’un kat‘a alâka ve medhali kalmamışdır dedikde gıbbe’t-tasdîk. Fî-gurreti R sene 1197 Şühûdü’l-hâl: İmâm Mehmed Efendi b. Halil, Müezzin Molla Salih b. Mehmed, İsmail b. Abdullah, Salih b. Halil, Molla Ali b. Halil ve gayruhum.