Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 309 Hüküm no: 323 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nesibe bt. Abdullah’ın vefat eden kocasından kendisi ile kardeşi Ahmed Efendi’ye miras kalan evin yanmasıyla arsasına ait hüccetin kendilerine verilmesini istemesi İstihbâr-ı menzil Mahmiye-i İslâmbol’da Kasab İlyas mahallesinde sâkin iken bundan akdem vefât eden Mustafa Ağa b. Mustafa’nın verâseti zevce-i metrûkesi Nesibe bt. Abdullah nâm hatun ile li-ebeveyn er karındaşı Hâcegân-ı Dîvân-ı Hümâyûn’dan Ahmed Efendi’ye münhasıra ve terekesinin rub‘u zevcesi mezbûre Nesibe Hatun’a ve selâse-i erbâ‘ı mûmâ-ileyh Ahmed Efendi’ye isâbeti tahakkukundan sonra zâtı vech-i şer‘î üzere mu‘arrefe olan işbu bâ‘isetü’l-kitâb mezbûre Nesibe Hatun meclis-i şer‘-i şerîf-i enverde takrîr-i kelâm ve bast-ı merâm edip mahalle-i mezbûrede vâki‘ bir tarafdan Şamlı Mustafa Ağa arsası ve bir tarafdan Osman Ağa arsası ve bir tarafdan mûmâ-ileyh Ahmed Efendi arsası ve bir tarafdan tarîk-i âm ile mahdûd fevkānî üç bâb oda ve sofa ve kenîf ve dehliz ve âbdesthâne ve tahtânî bir matbah ve kömürlük ve bi’r-i mâ ve bağçe ve mahzen ve bir mikdâr havlu ve tahtında biri terzi ve biri berber iki bâb dükkânı müştemil bir bâb mülk menzil mûrisimiz mezbûr Mustafa Ağa’nın hayatında ile’l-vefât yedinde mülk ve hakkı olup ba‘de vefâtihî menzil-i mahdûd-ı mezkûr benimle mûmâ-ileyh Ahmed Efendi’ye mevrûs oldukdan sonra muhterik olup arsası sırfa kalmağla arsa-i mahdûde-i mezkûre ber-vech-i muharrer mülk-i mevrûsumuz olduğunu müş‘ir yedimizde mülknâme hüccetimiz olmamağla takrîrim vukūf-ı tammı olan bî-garaz Müslimînden suâl ve istihbâr ve haberleri zabt u tahrîr ve hüccet olunup yedimize i‘tâ olunmak matlûbumdur dedikde hakīkat-i hâl mukırre-i mezbûre Nesibe Hatun’un bâlâda bast u beyân ve şerh u ayân eylediği minvâl üzere olduğunu Mehmed Ağa b. Hasan ve el-Hâc Mehmed b. Ebîbekir ve es-Seyyid Memiş Beşe b. Mehmed ve Ali Beşe b. Yusuf nâm kimesnelerden herbiri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb ketb olundu. Fî-gurreti şehri Rebî‘ülâhir sene 1197 Şühûdü’l-hâl: Es-Seyyid Memiş Beşe b. Mehmed, Ali Beşe b. Yusuf, Mehmed Ağa b. Hasan, el-Hâc Mehmed b. Ebîbekir.