Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 310 Hüküm no: 324 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacegan-ı Divan-ı Hümayun’dan Ahmed Efendi’nin kardeşinden miras kalan ev ve dükkân arsalarındaki hissesini diğer hissedar Nesibe Hatun’a satması ( ) mübâya‘ası Mahmiye-i İslâmbol’da Dikilitaş kurbünde Atik Ali Paşa mahallesinde sâkin Hâcegân-ı Dîvân-ı Hümâyûn’dan Ahmed Efendi b. Mustafa tarafından husûs-ı âti’l-beyânı ikrâra vekîl olduğu Mehmed Ağa b. Hasan ve el-Hâc Mehmed Ağa b. Ebîbekir nâm kimesneler şehâdetleriyle şer‘an sâbit olan Osman Ağa b. Ali nâm kimesne meclis-i şer‘-i hatîr-i lâzımü’t-tevkīrde mu‘arrefetü’z-zât işbu bâ‘isetü’l-kitâb Nesibe Hatun bt. Abdullah mahzarında bi’l-vekâle ikrâr ve takrîr-i kelâm edip mahmiye-i mezbûrede Davudpaşa iskelesi kurbünde Kasab İlyas mahallesinde vâki‘ bir tarafdan Şamlı Mustafa Ağa arsası ve bir tarafdan müvekkilim mûmâ-ileyh Ahmed Efendi’nin âhar arsası ve bir tarafdan Osman Ağa arsası ve bir tarafdan tarîk-i âm ile mahdûd bir bâb mülk menzil arsasıyla arsa-i mezkûre ittisâlinde biri terzi ve biri berber iki bâb mülk dükkân arsalarının dört sehm i‘tibârıyla bir sehmi mezbûre Nesibe Hatun’un ve üç sehmi müvekkilim mûmâ-ileyh Ahmed Efendi’nin irsen yedlerinde mülk ve hakları olmağın ve müvekkilim mûmâ-ileyh Ahmed Efendi zikr olunan arsalarda ber-vech-i muharrer mâlik olduğu üç sehm hisse-i irsiye-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûre Nesibe Hatun’a iki yüz elli guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr iki yüz elli guruş mütâlebesinden müvekkilim mûmâ-ileyh Ahmed Efendi mezbûre Nesibe Hatun’un zimmetini ibrâ-i âmm-ı sahîh-i şer‘î ile ibrâ ve ıskāt eylediğinde ol dahi ibrâsını kabûl eyledi, fîmâ-ba‘d arsa-i mahdûde-i mezkûreler mezbûre Nesibe Hatun’un müstakılleten mülk-i sahîh ve hakk-ı sarîhi olup müvekkilim mûmâ-ileyh Ahmed Efendi’nin kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 2 min-R sene 1197 Şühûdü’l-hâl: Es-Seyyid Hasan Beşe b. es-Seyyid Mehmed, Ali Beşe b. Yusuf, Mehmed Ağa b. Hasan, el-Hâc Mehmed Ağa b. Ebîbekir, Molla Ali b. Halil, Salih b. Halil, Hacı Hasan b. Osman.