Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 311 Hüküm no: 325 Orijinal metin no: [46b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nesibe Hatun’un Kasap İlyas mahallesindeki ev ve dükkân arsalarını Ali Ağa’ya satması Yine mübâya‘a-i mezbûr Mahmiye-i İslâmbol’da Dikilitaş kurbünde Atik Ali Paşa mahallesinde sâkine ve zâtı ta‘rîf-i şer‘î ile mu‘arrefe olan Nesibe Hatun bt. Abdullah meclis-i şer‘-i hatîr-i lâzımü’t-tevkīrde işbu bâ‘isü’l-kitâb Ali Ağa b. Abdullah nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye irsen ve şirâen yedimde mülk ve hakkım olup mahmiye-i mezbûrede Davudpaşa iskelesi kurbünde Kasab İlyas mahallesinde vâki‘ bir tarafdan Şamlı Mustafa Ağa arsası ve bir tarafdan Hâcegân-ı Dîvân-ı Hümâyûn’dan Ahmed Efendi arsası ve bir tarafdan Osman Ağa arsası ve bir tarafdan tarîk-i âm ile mahdûd derûnunda bir bi’r-i mâ ve bir mahzen ve enkāz-ı mevcûde hâvî bir bâb mülk menzil arsası ve ittisâlinde kâin biri terzi ve biri berber iki bâb mülk dükkân arsalarımı bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûr Ali Ağa’ya üç yüz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr üç yüz guruşu mezbûr Ali Ağa yedinden tamamen ahz ü kabz eyledim, ba‘de’l-yevm zikr olunan menzil ve dükkân arsaları mezbûr Ali Ağa’nın mülk-i müşterâsı ve hakk-ı sarfı olup benim kat‘a alâka ve medhalim kalmamışdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a. Fî 3 Rebî‘ülâhir sene 1197 Şühûdü’l-hâl: Şâhidûn-ı sâbıkūn.