Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 311 Hüküm no: 326 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap İlyas mahallesinden Ali Ağa b. Abdullah’ın ev ve dükkân arsalarının yarısını karısına satması Yine mübâya‘a-i menzil-i mezbûr Mahmiye-i İslâmbol’da Kasab İlyas mahallesinde sâkin Ali Ağa b. Abdullah nâm kimesne meclis-i şer‘-i şerîf-i enverde hâlâ zevcesi işbu bâ‘isü’l-kitâb Âişe bt. el-Hâc Halil nâm hatun tarafından husûs-ı âti’l-beyânı tasdîka vekîl olduğu ber-nehc-i şer‘î sâbit olan Molla Ali b. Halil nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahalle-i mezbûrede vâki‘ bir tarafdan Şamlı Mustafa Ağa arsası ve bir tarafdan Osman Ağa arsası ve bir tarafdan Hâcegân-ı Dîvân-ı Hümâyûn’dan Ahmed Efendi arsası ve bir tarafdan tarîk-i âm ile mahdûd derûnunda bir bi’r-i mâ ve bir mahzen ve enkāz-ı mevcûdeyi hâvî bir bâb mülk menzil arsası ve ittisâlinde biri terzi ve biri berber iki bâb dükkân arsalarınımın nısf-ı şâyi‘lerini yedimde ba‘de’l-ibkā ve nısf-ı şâyi‘-i âharlarını tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevcem müvekkile-i mezbûre Âişe Hatun’a yüz elli guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz elli guruş mütâlebesinden zevcem müvekkilem mezbûre Âişe Hatun’un zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm zikr olunan menzil ve dükkân arsalarının nısf-ı şâyi‘lerinde kat‘a alâka ve medhalim kalmayıp zevcem müvekkile-i mezbûre Âişe Hatun’un mülk-i müşterâsı ve hakk-ı sarfı olmuşdur dedikde gıbbe’t-tasdîki’ş-şer‘î mâ-vaka‘a. Fî 4 Rebî‘ülâhir sene 1197 Şühûdü’l-hâl: Şâhidûn-ı sâbıkūn.