Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 312 Hüküm no: 327 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canbaziye mahallesinden Hasan Ağa’nın bazı eşyalarını karısına satması Eşyâ mübâya‘ası Mahmiye-i İslâmbol’da Koca Mustafa Paşa kurbünde Canbaziye mahallesinde sâkin el-Hâc Hasan Ağa b. Ali tarafından ber-vech-i âtî ikrâra vekîl olduğu Molla Hüseyin b. Ali ve Osman Beşe b. Ali nâm kimesneler şehâdetleriyle şer‘an sâbit olan el-Hâc Halil b. Mehmed nâm kimesne meclis-i şer‘-i şerîf-i enverde müvekkil-i mezbûrun hâlâ zevcesi mu‘arrefetü’z-zât işbu bâ‘isetü’l-kitâb Âişe bt. Ali nâm hatun mahzarında bi’l-vekâle ikrâr ve takrîr-i kelâm edip müvekkilim mezbûr el-Hâc Hasan Ağa eşyâ-i memlûkesinden bâ-defter-i müfredât yün memlû beş yasdık ve üç yemeni yorgan bâ-çârşeb ve üç minder ve bir beledî döşek ve bir kırmızı şilte ve bir köhne Yanbolu kebesi ve bir orta keçesi ve bir çukaya kaplı cild-kafa kürk ve bir Şam alacası entari ve bir destâr ve iki gömlek ve bir çuka çakşır ve dört sahan bâ-kapak ve iki tencere bâ-kapak ve bir mankāl ve bir âbdest ibriği ve bir şorba tası ve dört kahve ibriği ve iki şamdan ve bir tâbesini târih-i kitâbdan üç ay mukaddem tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûre Âişe Hatun’a üç yüz guruşa bey‘ ve temlik ve teslîm eylediğinde ol dahi târih-i mezbûrda ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr otuz guruş mütâlebesinden müvekkilim mezbûr el-Hâc Hasan Ağa zevcesi mezbûre Âişe Hatun’un zimmetini ibrâ ve ıskāt eylediğinde ol dahi ibrâsını kabûl etmeğin ol-vechile eşyâ-i muharrere-i mezkûre târih-i mezbûrdan beri mezbûre Âişe Hatun’un mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 28 Ra sene 1197 Şühûdü’l-hâl: Molla Hüseyin b. Ali, İmâm İsmail Efendi b. Ali, Osman Beşe b. Ali, Hasan Efendi b. ( ), Mehmed Beşe b. ( ), Tesbîhçi Molla Ahmed, Müezzin Molla Hüseyin b. Ali ve gayruhum.