Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 313 Hüküm no: 328 Orijinal metin no: [47a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun’un Sarı Musa Efendi mahallesindeki ev arsasını Halime Hatun’a satması Arsa mübâya‘ası, tarafeynden vekâleten Mahrûse-i Galata’ya muzâfe İstinye nâhiyesine tâbi‘ Rumelihisârı’nda sâkine Safiye Hatun bt. Abdullah tarafından husûs-ı âti’l-beyânı ikrâra vekîl olduğu zâtını ârifân es-Seyyid Mehmed Tâhir Efendi b. es-Seyyid Mustafa ve Abdullah Beşe b. Abdullah şehâdetleriyle şer‘an sâbit olan es-Seyyid el-Hâc Lütfullah Efendi b. es-Seyyid el-Hâc Mehmed meclis-i şer‘-i hatîr-i lâzımü’t-tevkīrde işbu bâ‘isetü’l-vesîka Halime Hatun bt. Abdullah tarafından vech-i âtî üzere tasdîka vekîl olduğu ber-nehc-i şer‘î sâbit olan Mehmed Şemseddin Efendi b. Osman mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilem mezbûre Safiye Hatun’un bâ-hüccet-i şer‘iye şirâen yedinde mülk ve hakkı olup mahmiye-i İslâmbol’da Sarı Musa Efendi mahallesinde vâki‘ bir tarafdan Haremeyn Vakfı’ndan Şeyhülislâm-ı esbak es-Seyyid Murtaza Efendi kerîmesi Ümmügülsüm Hanım tasarrufunda olan arsa ve bir tarafdan kuzâtdan Habib Efendi arsası ve bir tarafdan bogasici Hüseyin Çelebi Vakfı’ndan dekâkin arsası ve bir tarafdan tarîk-i âm ile mahdûd derûnunda iki bi’r-i mâ ve bir mahzen ve bir harâb hamam ve enkāz-ı mevcûde-i ma‘lûmeyi hâvî tûlen ve arzan bi-hesâbı terbî‘i dokuz yüz zirâ‘ bir bâb muhterik mülk menzil arsasını cümle-i tevâbi‘ ve levâhıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkile-i mezbûre Halime Hatun’a bin iki yüz elli guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr bin iki yüz elli guruşu müvekkilem mezbûre Safiye Hatun müvekkile-i mezbûre Halime Hatun yedinden tamamen ahz ü kabz eyledi, ba‘de’l-yevm arsa-i mahdûde-i mezkûre müvekkile-i mezbûre Halime Hatun’un mülk-i müşterâsı ve hakk-ı sarfı olup müvekkilem mezbûre Safiye Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a. Fî 2 Rebî‘ülâhir sene 1197 Şühûdü’l-hâl: Müderrisîn-i kirâm-ı zevi’l-ihtirâmdan Keçecizâde Molla Salih Efendi, Müderrisîn-i kirâm-ı zevi’l-ihtirâmdan Kevakibizâde es-Seyyid el-Hâc Mustafa Râcih Efendi, eş-Şeyh Abdüssamed Efendi, Mahmud Efendi b. Ahmed, es-Seyyid Mehmed Tâhir Efendi b. es-Seyyid Mustafa, Abdullah Beşe b. Abdullah, el-Hâc Osman Ağa, Molla Ali b. Halil.