Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 314 Hüküm no: 329 Orijinal metin no: [47a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arabacı Bayezid mahallesinden vefat eden Ali b. Mehmed’in hanımı Hafize’nin terekeden hakkını alarak diğer vârislerin zimmetlerini ibra etmesi Terekeden ibrâ Mahmiye-i İslâmbol’da Arabacı Bâyezid mahallesinde sâkin iken bundan akdem vefât eden Ali b. el-Hâc Mehmed’in verâseti zevce-i metrûkesi Hafize bt. Hüseyin nâm hatun ile vâlidesi Âişe bt. Mustafa nâm hatuna ve li-ümmin er karındaşı Ahmed b. Mehmed’e ve li-ebeveyn er karındaşı Mehmed Emin b. el-mezbûr el-Hâc Mehmed’e münhasıra ve mesele-i mîrâsları on iki sehm i‘tibârıyla üç sehmi zevcesi mezbûre Hafize Hatun’a ve iki sehmi vâlidesi mezbûre Âişe Hatun’a ve iki sehmi karındaşı mezbûr Ahmed’e ve bâkī beş sehmi mezbûr Mehmed Emin’e isâbeti tahakkukundan sonra zâtı vech-i şer‘î üzere mu‘arrefe olan mezbûre Hafize Hatun meclis-i şer‘-i şerîf-i enverde müteveffâ-yı mezbûrun terekesine bi’l-verâse vâzı‘atü’l-yed olan mu‘arrefetü’z-zât işbu bâ‘isetü’l-kitâb mezbûre Âişe Hatun mahzarında bi’l-verâse ikrâr ve takrîr-i kelâm edip zevcim mûrisim müteveffâ-yı mezbûrun hîn-i vefâtında yanında mevcûd bi’l-cümle terekesi esmânından hâsıl ba‘de ihrâci’l-mesârifi’l-lâzıme ve’d-düyûn sahhu’l-bâkī yetmiş guruşuna vâlidesi mezbûre Âişe Hatun bi’l-verâse vâzı‘atü’l-yed olmağla meblağ-ı mezbûrdan zevcim müteveffâ-yı mezbûrun zimmetinde ma‘kūdun-aleyh olan yirmi beş guruş mehr-i müeccelim ile ber-i‘tibâr-ı mezkûr benim rub‘ hisseme isâbet eden on iki buçuk guruş ki [47b] cem‘an otuz yedi buçuk guruşu mezbûre Âişe Hatun’un vâzı‘atü’l-yed olduğu meblağ-ı mezbûr yetmiş beş guruşdan olmak üzere mezbûre Âişe Hatun yedinden tamamen ahz ü kabz ve istifâ-yı hak edip zevcim mûrisim müteveffâ-yı mezbûr Ali’nin kalîl ü kesîr celîl ü hakīr bi’l-cümle ism-i mâl ıtlâk olunur terekesine ve hukūk-ı mîrâsa müte‘allika âmme-i de‘âvî ve kâffe-i mütâlebâtdan mezbûre Âişe Hatun ile karındaşları mezbûrân Mehmed Emin ve Ahmed’den herbirinin zimmetlerini ibrâ ve ıskāt eylediğimde onlardan herbiri dahi ibrâmı kabûl eylediler dedikde gıbbe’t-tasdîki’ş-şer‘î mâ-vaka‘a bi’t-taleb. Fî-gurreti şehri Rebî‘ülâhir sene 1197 Şühûdü’l-hâl: Mehmed Emin Efendi b. Mustafa Kirişçi, Mehmed b. Ali, İsmail Beşe b. Abdullah, Mehmed b. Abdullah, Molla Ali b. el-Hâc Ahmed Kirişçi, Abdullah Ağa b. Abdullah, Molla Ali b. Halil.