Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 315 Hüküm no: 330 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Fatma Hatun’un evini Bostancı Mustafa Bölükbaşı’na satması Menzil mübâya‘ası Mahmiye-i İslâmbol’da Ali Fakih mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Fatıma Hatun bt. İsmail meclis-i şer‘-i hatîr-i lâzımü’t-tevkīrde işbu bâ‘isü’l-kitâb Bostânî Mustafa Bölükbaşı b. Hasan nâm kimesne mahzarında ikrâr-ı tam ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahalle-i mezbûrede vâki‘ bir tarafdan Debbâğ el-Hâc Mehmed mülkü ve bir tarafdan Haremeyn-i Şerîfeyn Vakfı’ndan yine mezbûr el-Hâc Mehmed tasarrufunda olan vakıf menzil ve bir tarafdan mahalle-i mezbûre avârızı vakfından Süleyman Beşe tasarrufunda olan vakıf menzil ve bir tarafdan tarîk-i âm ile mahdûd fevkānî iki bâb oda ve bir sofa ve kenîf ve âbdesthâne ve tahtânî üç bâb oda ve matbah ve hamam ve mahzen ve ahur ve kenîf ve bi’r-i mâ ve bağçe ve bir mikdâr havluyu müştemil bir bâb mülk menzil[imi] bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûr Mustafa Bölükbaşı’ya bin elli guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr bin elli guruşu mezbûr Mustafa Bölükbaşı yedinden tamamen ahz ü kabz eyledim, ba‘de’l-yevm menzil-i mahdûd-ı mezkûr cemî‘ müştemilâtıyla mezbûr Mustafa Bölükbaşı’nın mülk-i müşterâsı ve hakk-ı sarfı olup benim kat‘a alâka ve medhalim kalmamışdır, keyfe mâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î mâ-vaka‘a. Fî 4 Rebî‘ülâhir sene 1197 Şühûdü’l-hâl: Hafız Mehmed Efendi b. Abdullah Müezzin-i mahalle, Feyzullah Efendi b. el-Hâc Abdullah, Hüseyin Efendi b. Mehmed, Hafız İsmail Efendi b. Ali, Kirişçi es-Seyyid Mehmed Ağa b. İbrahim, Mehmed Salih Efendi b. Ali, Bostânî Abdullah b. Ahmed, Süleyman Bölükbaşı b. Davud, Bostânî İsmail Ağa b. Mahmud, Molla Ali b. Halil, Molla Hasan b. Süleyman, Hacı Hasan b. Osman ve gayruhum.