Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 316 Hüküm no: 331 Orijinal metin no: [47b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ereğli mahallesinden Ayşe bt. Ahmed’in kocası Dergâh-ı âlî sekbanlarından Ömer Ağa’ya mehri ile ziynet eşyalarını hibe etmesi ve bazı eşyalarını da satması Eşyâ mübâya‘ası Mahmiye-i İslâmbol’da Şehremîni kurbünde Ereğli mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Âişe bt. Ahmed nâm hatun meclis-i şer‘-i hatîr-i lâzımü’t-tevkīrde hâlâ zevci ve Dergâh-ı âlî sekbânlarının on dört sekbânlar odabaşısı işbu bâ‘isü’l-vesîka Ömer Ağa b. Mustafa mahzarında ikrâr ve takrîr-i kelâm edip zevcim mezbûr Ömer Ağa zimmetinde ma‘kūdun-aleyh olan kırk guruş mehr-i müeccelim ile yedimde mâlım ve mülküm olan yirmi miskāl bir çift altın bilezik ve bir çift altın kuşak ve bir elmaslı gerdâniye ve iki elmas çiçek ve zümrüd taşlı bir altın yüzük ve bir çift elmas küpemi hibe-i sahîha-i şer‘iye ile zevcim mezbûr Ömer Ağa’ya hibe ve temlik ve teslîm eylediğimde ol dahi meclis-i hibede bilâ-mâni‘ ittihâb ve temellük ve tesellüm ve kabz u kabûl eyledikden sonra eşyâ-i memlûkemden üstûfeye kaplı bir semmûr kürk ve şerîtli kadife cübbe ve biri Mahmûdiye ve biri peten iki entari ve iki çiçekli entari ve bir şalî ferâce ve bir yaşmak ma‘a makrame ve bir hamam takımı ve beş değirmi baş yemenisi ve üç hilâlî gömlek ma‘a don ve on vakıyye evân-ı nühâsiye ve bir sepet sandığımı dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevcim mezbûr Ömer Ağa’ya yüz yirmi guruşa bey‘ ve temlik ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz yirmi guruş mütâlebesinden zevcim mezbûr Ömer Ağa’nın zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm mehr-i müeccel-i mezkûr kırk guruşdan zevcim mezbûr Ömer Ağa’nın zimmeti berî ve zikr olunan huliyyât mülk-i mevhûbu ve eşyâ-i muharrere-i mezkûre dahi mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mukırre-i mezbûre Âişe Hatun yine meclis-i şer‘de zevc-i mezbûr Ömer Ağa mahzarında i‘âde-i kelâm edip zevcim mezbûr Ömer Ağa ile mahalle-i mezbûrede vâki‘ mâ‘an sâkinler olduğumuz menzil derûnunda mevcûd mefrûşât ve melbûsât ve evân-ı nühâsiye ve gayr-ı nühâsiye ve bi’l-cümle eşyâ-i sâire zevcim mezbûr Ömer Ağa’nın mâlı ve mülkü olup benim aslâ alâka ve medhalim yokdur dedikde mâ-vaka‘a. Fî 4 Rebî‘ülâhır sene 1197 Şühûdü’l-hâl: Sekbân sekiz cemâ‘atin Ahmed Odabaşı Ağa b. Mehmed, Mehmed Odabaşı b. Hüseyin, Otuzyedi Bölükün Ömer Odabaşı b. Mehmed, Ebûbekir Ağa b. Mehmed, Halil Ağa b. Abdullah, Mehmed Salim Efendi b. Hüseyin, Feyzullah Efendi b. el-Hâc Abdullah, Mehmed Efendi b. Abdüsselam, Molla Ali b. Halil, Hacı Hasan b. Osman, Molla Hasan b. Süleyman ve gayruhum.