Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 317 Hüküm no: 332 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Solak Sinan mahallesinden İbrahim b. Hüseyin’in boşadığı hanımı Hadice’nin başkasıyla evlenmesine izin verilmesi Zât-ı hayz ve yemînle tasdîk ve zevc-i âhara izin Medîne-i Üsküdar’da Solak Sinan mahallesinde sâkin İbrahim b. Hüseyin nâm kimesnenin zevce-i mutallakası ve yevm-i tatlîkden târih-i kitâba gelince altmış iki gün mürûr eylediği zevc-i mutallıkı mezbûrun yedinde olan bir kıt‘a i‘lâm-ı şer‘iye mantûkunca zâhir olan mu‘arrefetü’z-zât işbu bâ‘isetü’l-kitâb Hadice bt. İbrahim nâm hatun meclis-i şer‘-i hatîr-i lâzımü’t-tevkīrde takrîr-i kelâm ve bast-ı merâm edip ben zât-ı hayz olmamla yevm-i tatlîkden târih-i kitâba gelince altmış iki gün içinde tuhr-ı muhallel ile üç def‘a hayz-ı kevâmil görüp iddetim münkaziye olmağın nefsimi âhara tezevvüc bana helâl oldu deyü eylediği da‘vâsında sâdıka olup ve kütüb-i fıkhiyyede “ve ekallü’l-müddeti elletî tusaddaku’l-hurre fî-inkızâi’l-iddeti şehrâni” mesele-i müftâ-bihâsı üzere mezbûre Hadice Hatun mubtıla ve kâzibe olmadığına hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri yemîn teklif eyledikde ol dahi alâ-vefkı’l-mesûl half billâhi’l-aliyyi’l-a‘lâ etmekle mezbûre Hadice Hatun nefsini dilediği kimesneye akd ve tezevvüce kıbel-i şer‘den izin verilmeğin mâ-vaka‘a. Fî 5 min-R sene 1197 Şühûdü’l-hâl: Es-Seyyid Mehmed Beşe b. Mustafa, Molla Ali b. Halil, Hacı Hasan b. Osman, Salih b. Halil.