Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 317 Hüküm no: 333 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bucakbağı mahallesinden İsmail Efendi’nin vefatından sonra vasiyetini yerine getirmek üzere Hüseyin Ağa’yı vasi tayin etmesi Vasiyet Mahmiye-i İslâmbol’da Yedikule kapısı dâhilinde Bucakbağı mahallesinde sâkin İsmail Efendi b. İbrahim tarafından ber-vech-i âtî vekîl olduğu mahalle-i mezbûre imâmı Mustafa Efendi b. Halil ve İsmail b. Osman şehâdetleriyle sâbit olan Ahmed Ağa b. Mehmed nâm kimesne meclis-i şer‘-i şerîf-i enverde işbu bâ‘isü’l-kitâb es-Seyyid Hüseyin Ağa b. es-Seyyid Hasan mahzarında bi’l-vekâle ikrâr ve takrîr-i kelâm edip müvekkilim mezbûr İsmail Efendi şöyle vasiyet eyledi ki, ben bi-emrillâhi te‘âlâ vefât eylediğimde mezbûr es-Seyyid Hüseyin Ağa benim vasîyy-i muhtârım olup bi’l-cümle terekemi bi’l-vesâye ahz ü kabz edip evvelâ vech-i mestûre üzere levâzım-ı defnim umûruna terekemden kırk guruş harc ü sarf eyleye ve hâlâ zevcem Emine bt. Abdullah nâm hatuna zimmetimde ma‘kūdun-aleyh olan iki yüz elli guruş mehr-i müeccelini ba‘de’l-edâ bâkī kalan terekemin sülüsü ifrâz ve sülüs-i mezbûrdan elli guruş ıskāt-ı salât-ı fâitem ve on guruş kefâret-i yemîn ve savm ve sâir nüzûrâtım içün fukarâ-i Müslimîn beyninde devr ve tasadduk oluna ve sülüs-i mezbûrdan on guruş ile iki aded taş iştirâ olunup merkadimin baş ve ayak câniblerine vaz‘ etdire ve sülüs-i mezbûrdan hizmetimde olan Abdullah Beşe b. el-Hâc Mustafa’ya on beş guruş verile ve yine sülüs-i mezbûrdan vasîyy-i mezbûr kendi nefsi içün otuz guruş ahz ü kabz eyleye ve sülüs-i mezbûrdan her ne fazla kalır ise vasîyy-i mezbûr dilediği vücûh-ı birre harc ü sarf ve sülüsân terekemi dahi zevcem mezbûre ile li-ümmin kız karındaşım Saliha Hatun ve li-ebeveyn er karındaşım oğulları Rıza ve Nuriş ibney Abdi Ağa beynlerinde alâ mâ-farazallâhu te‘âlâ tevzî‘ ve taksîm oluna deyü vasiyet ve tenfîzine mezbûr es-Seyyid Hüseyin Ağa’yı vasîyy-i muhtâr nasb ü ta‘yîn eyledim dedi dedikde ol dahi vesâyet-i mezkûreyi kabûl ve hizmet-i lâzımesin kemâ-yenbağī edâya ta‘ahhüd ve iltizâm etmeğin mâ-vaka‘a bi’t-taleb. Fî 4 Rebî‘ülâhır sene 1197 Şühûdü’l-hâl: İmâm Mustafa Efendi b. Halil, es-Seyyid Osman Efendi b. es-Seyyid Mehmed, Müezzin Ahmed Efendi b. Hasan, Dellâk Mustafa Beşe b. Ali, Molla Mustafa b. Abdullah, Ahmed Efendi b. Mehmed, Mütevellî Halil Efendi b. Osman, Mehmed Efendi b. Mustafa, Osman Beşe b. Sinan, İsmail Beşe b. Osman, Molla Ali b. Halil, Hacı Hasan b. Osman.