Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 318 Hüküm no: 334 Orijinal metin no: [48a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bucakbağı mahallesinden Emine bt. Abdullah’ın vefatından sonra vasiyetini yerine getirmek üzere Hüseyin Ağa’yı vasi tayin etmesi Kezâlik vasiyet Mahmiye-i İslâmbol hısnı ebvâbından Yedikule kapısı dâhilinde Bucakbağı mahallesinde sâkine Emine bt. Abdullah nâm hatun tarafından husûs-ı âti’l-beyânı ikrâra vekîl olduğu zâtını ârifân Mustafa Efendi b. Halil ve İsmail b. Osman şehâdetleriyle sâbit olan Ahmed Ağa b. Mehmed nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb es-Seyyid Hüseyin Ağa b. es-Seyyid Hasan mahzarında bi’l-vekâle ikrâr ve takrîr-i kelâm edip müvekkilem mezbûre Emine Hatun şöyle vasiyet eyledi ki, ben bi-emrillâhi te‘âlâ vefât eylediğimde mezbûr es-Seyyid Hüseyin Ağa benim vasîyy-i muhtârım olup mecmû‘-ı terekemi bi’l-vesâye ahz ü kabz eyledikden sonra evvelâ sünnet-i seniyye üzere techîz ve tekfîn ve defnim umûruna terekemden yirmi beş guruş harc u sarf edip bâkī kalan terekemin sülüsü ifrâz ve sülüs-i mezbûrdan ıskāt-ı salât ve keffârât-ı yemîn ve savb ve sâir nüzûrâtım içün elli guruş fukarâ-i Müslimîn beyninde devr ve tasadduk oluna ve sülüs-i mezbûrdan yirmişer guruşdan cem‘an kırk guruş hediyeli iki aded Mushaf-ı şerîf iştirâ ve vakfiyet üzere talebe-i ulûmdan birer müstahak kimesnelere verile ve sülüs-i mezbûrdan seksen guruş ile münâsib mahâlde bir kuyu hafr ve etrâfı taş örüle ve sülüs-i mezbûrdan işbu hâzır bi’l-meclis Abdullah Beşe b. el-Hâc Mustafa’ya on guruş verile ve sülüs-i mezbûrdan her ne fazla kalır ise vasîyy-i mezbûr dilediği vücûh-ı birre harc u sarf ede ve benim vâris ve vârisem olmayıp benim içün vasiyet bi-mâ zâde ale’s-sülüs câize olmağla sülüsân-ı bâkıyemi dahi vasîyy-i mezbûr bi-hükmi’l-vasiyye kendi nefsi içün ahz ü kabz eyleye deyü vasiyet ve tenfîzine mezbûr es-Seyyid Hüseyin Ağa’yı vasîyy-i muhtâr nasb ü ta‘yîn eyledim dedi dedikde mezbûr es-Seyyid Hüseyin Ağa dahi ber-vech-i muharrer vesâyet-i merkūmeyi kabûl ve hizmet-i lâzımesin kemâ-yenbağī edâya ta‘ahhüd ve iltizâm etmeğin mâ-vaka‘a bi’t-taleb. Fî 4 min-şehri Rebî‘ülâhir sene 1197 Şühûdü’l-hâl: Şâhidûn-ı sâbıkūn.