Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 319 Hüküm no: 335 Orijinal metin no: [48a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bucakbağı mahallesinden Ümmügülsüm bt. İbrahim’in ev hizmetiyle yanında çalıştığı Emine bt. Abdullah’tan hizmeti karşılığı bazı eşyalar alarak zimmetini ibra etmesi Ecr-i mislinden ibrâ Mahmiye-i İslâmbol’da Yedikule kapısı Bucakbağı mahallesinde sâkine takrîben on üç yaşında olup sinn ve cüssesinin bulûğa tahammülü olmağla rü’yet-i dem-i hayzla bulûğunu mu‘terife ve zâtı zeyl-i vesîka muharrerü’l-esâmî Müslimîn ta‘rîfleriyle mu‘arrefe olan Ümmügülsüm bt. İbrahim nâm bikr-i bâliğa meclis-i şer‘-i şerîf-i enverde işbu bâ‘isetü’l-kitâb Emine bt. Abdullah nâm hatun tarafından husûs-ı âti’l-beyânı tasdîka vekîl olduğu ber-nehc-i şer‘î sâbit olan Ahmed Ağa b. Mehmed nâm kimesne mahzarında ikrâr ve takrîr-i kelâm edip müvekkile-i mezbûre Emine Hatun târih-i kitâbdan sekiz sene mukaddem merhameten beni yanına alıp târih-i kitâba gelince sıgār ve kiberim hâllerinde müvekkile-i mezbûreye talebiyle menzilinde bilâ-tesmiyeti’l-ücre sekiz sene hizmetim sebk etmekle müddet-i mezkûrede eylediğim hizmetimin ecr-i misli mukābelesinde müvekkile-i mezbûre Emine Hatun mâlından yün memlû sekiz beledî yasdık ve dört minder ma‘a yemeni mak‘ad ve bir döşek ve iki yemeni yorgan ma‘a çârşeb ve iki tencere ma‘a kapak ve dört sahan ma‘a kapak ve bir leğen ma‘a ibrik [48b] ve bir sini ve bir tepsi ve bir tâbe ve bir şorba tası ve bir lenger ve bir Mısır hasırını bana def‘ ve teslîm eyledikde ben dahi bi-a‘yânihâ yedinden tamamen ahz ü kabz edip müddet-i mezkûrede sebk eden hizmetimin şer‘an lâzım gelen ecr-i misline müte‘allika âmme-i de‘âvî ve kâffe-i mütâlebâtdan müvekkile-i mezbûre Emine Hatun ile zevci İsmail Efendi b. İbrahim’den herbirinin zimmetlerini ibrâ ve ıskāt eylediğimde onlar dahi ibrâmı kabûl eylediler dedikde gıbbe’t-tasdîki’ş-şer‘î mâ-vaka‘a bi’t-taleb. Fî 4 min-şehri Rebî‘ülâhir sene 1197 Şühûdü’l-hâl: Eş-şâhidûnü’s-sâbıkūn.