Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 320 Hüküm no: 337 Orijinal metin no: [48b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Davudpaşa mahallesinden Hanife bt. Ahmed’in kendisini boşayan kocasındaki alacaklarını alarak zimmetini ibra etmesi Tatlîk Mahmiye-i İslâmbol’da Davudpaşa mahallesinde sâkine ve zâtı vech-i şer‘î üzere mu‘arrefe olan Hanife bt. Ahmed nâm hatun meclis-i şer‘-i şerîf-i enverde zevc-i mutallıkı işbu bâ‘isü’l-kitâb Molla Salih b. Mehmed nâm kimesne mahzarında ikrâr ve takrîr-i kelâm edip mezbûr Molla Salih zevc-i dâhilim olduğu hâlde târih-i kitâb günü beni bâyinen tatlîk etmekle zimmetinde ma‘kūdun-aleyh olan on guruş mehr-i müeccel hakkım ile nafaka-i iddet-i mu‘ayyene ve meûnet-i süknâm içün bi’t-terâzî beynimizde ta‘yîn olunan iki guruş ki cem‘an on iki guruşu zevc-i mutallıkım mezbûr Molla Salih işbu meclis-i şer‘de bana def‘ ü teslîm eylediğinde ben dahi yedinden tamamen ahz ü kabz edip hukūk-ı zevciyete müte‘allika âmme-i de‘âvî ve kâffe-i mütâlebâtdan ben zevc-i mutallıkım mezbûr Molla Salih’in zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 5 min-R sene 1197 Şühûdü’l-hâl: Molla Mustafa b. Hüseyin, Mehmed Ağa b. İsmail, İbrahim Beşe b. Mehmed, Salih b. Halil, Molla Ali b. Halil ve gayruhum.