Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 321 Hüküm no: 338 Orijinal metin no: [48b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskenderağa mahallesinden Emine bt. Salih’in kocasından boşanması Muhâla‘a Mahmiye-i İslâmbol’da İskender Ağa mahallesinde sâkine ve zâtı vech-i şer‘î üzere mu‘arrefe olan Emine bt. Salih nâm hatun meclis-i şer‘-i şerîf-i enverde zevc-i dâhili işbu bâ‘isü’l-vesîka A‘mâ es-Seyyid Osman b. Abdülkerim nâm kimesne mahzarında ikrâr ve takrîr-i kelâm edip mezbûr es-Seyyid Osman zevcim olup lâkin beynimizde hüsn-i mu‘âşeretimiz olmamağla zimmetinde mütekarrer ve ma‘kūdun-aleyh olan üç yüz akçe mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olup ve zevcim mezbûrun firâşından hâsıla ve benden mütevellide ve hâlâ bi-hakkı’l-hıdâne hacr u terbiyemde olan takrîben dört yaşında Şerife Âişe nâm sagīreyi dahi dokuz yaşını edinceye değin kendi mâlımdan teberru‘an infâk ve iksâ etmek üzere zevcim mezbûr es-Seyyid Osman ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allika âmme-i de‘âvî ve kâffe-i mütâlebâtdan ben zevcim mezbûr es-Seyyid Osman’ın zimmetini ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip herbirimiz âharın ibrâsını kabûl eyledik dedikde gıbbe’t-tasdîk. Fî 3 min-R sene 1197 Şühûdü’l-hâl: Molla Ali b. Halil, Salih b. Halil, Bostânî Ali Ağa b. Mehmed, Mustafa b. Mustafa, Hacı Hasan b. Osman, Ahmed Çelebi b. Mehmed ve gayruhum.