Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 321 Hüküm no: 339 Orijinal metin no: [48b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amasya kazası İnepazarı köyünden Fatma bt. Ömer’in Ahmed b. Mehmed’deki alacağını tahsili ve Cafer Ağa mahallesindeki dükkân hissesini başkasına ferağ etmek üzere kardeşi Osman’a vekâlet vermesi İsbât-ı vekâlet Vilâyet-i Anadolu’da Amasya kazâsına tâbi‘ İnepazarı karyesinde sâkine Fatıma bt. Ömer nâm hatunun li-ebeveyn er karındaşı ve tarafından ber-vech-i âtî vekâlet iddi‘â eden işbu bâ‘isü’l-kitâb Osman nâm kimesne meclis-i şer‘-i şerîf-i enverde Ahmed b. Mehmed nâm kimesne mahzarında üzerine da‘vâ ve takrîr-i kelâm edip kız karındaşım müvekkilem mezbûrenin mezbûr Ahmed zimmetinde cihet-i karzdan beş guruş alacak hakkı olmağla meblağ-ı mezbûr beş guruşu mezbûr Ahmed’den taleb ve da‘vâ ve ahz ü kabza ve mahmiye-i İslâmbol’da Cafer Ağa mahallesinde kâin ma‘lûmü’l-hudûd iki kepenk bir bâb vakıf attâr dükkânının dört sehm i‘tibârıyla bir sehmi Hacı Mehmed b. Yusuf’un ve üç sehmi müvekkilem mezbûre Fatıma Hatun’un taht-ı tasarruflarında olmağla kız karındaşım müvekkile-i mezbûrenin dükkân-ı mezkûrda ber-vech-i muharrer mutasarrıfa olduğu üç sehmini âhara ferâğ ve kabz-ı bedele ve bedel-i mezkûr ile meblağ-ı mezbûru kendüye îsâl ve teslîme ve husûs-ı mezkûr mütevakkıf olduğu umûrun küllîsine tarafından beni vekîl ve nâib-i menâb nasb u ta‘yîn eyledikde ben dahi vekâlet-i mezbûreyi kabûl etmemle vekâlet-i mahkiyem hasebiyle meblağ-ı mezbûru mezbûr Ahmed’den taleb ederim, suâl olunup alıverilmesi matlûbumdur dedikde mezbûr Ahmed dahi [49a] cevâbında müvekkile-i mezbûreye cihet-i mezkûreden beş guruş deyni olduğunu ikrâr lâkin müdde‘î-i mezbûrun vekâletini inkâr edicek, müdde‘î-i mezbûrdan ber-minvâl-i muharrer müdde‘âsına mutâbıka beyyine taleb olundukda udûl-ı ahrâr-ı ricâl-i Müslimînden ve karye-i mezbûre ahâlisinden Receb b. Osman ve Mustafa b. Hüseyin nâm kimesneler zât-ı mezbûreyi ârifân oldukları hâlde li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka vilâyet-i Anadolu’da Amasya kazâsına tâbi‘ İnepazarı karyesinde sâkine Fatıma bt. Ömer nâm hatun işbu Ahmed b. Mehmed zimmetinde cihet-i karzdan alacak hakkı olan beş guruşu mezbûr Ahmed’den taleb ve da‘vâ ve ahz ü kabza ve mahmiye-i İslâmbol’da Cafer Ağa mahallesinde kâin ma‘lûmü’l-hudûd iki kepenk bir bâb vakıf attâr dükkânının dört sehm i‘tibârıyla bir sehmi Hacı Mehmed b. Yusuf’un ve üç sehmi müvekkilem mezbûrenin taht-ı tasarruflarında olmağla müvekkile-i mezbûre Fatıma Hatun dükkân-ı mezkûrda ber-vech-i muharrer mutasarrıfa olduğu üç sehmini âhara ferâğ ve kabz-ı bedele ve bedel-i mezkûr ile meblağ-ı mezbûru kendüye îsâl ve teslîme ve husûs-ı mezkûr mütevakkıf olduğu umûrun küllîsine karındaşı işbu müdde‘î-i mezbûr Osman’ı bizim huzûrumuzda tarafından vekîl ve nâib-i menâb nasb u ta‘yîn eylediğinde ol dahi ber-minvâl-i muharrer vekâlet-i mezbûreyi kabûl eyledi, biz bu husûsa bu vech üzere şâhidleriz, şehâdet ederiz deyü herbiri mezbûr Ahmed muvâcehesinde edâ-i şehâdet-i şer‘iye etdiklerinde gıbbe ri‘âyet-i şerâiti’l-kabûl şehâdetleri makbûle olmağın mûcebiyle ba‘de’l-hükm ve’t-tenbîh mâ-vaka‘a. Fî 6 Rebî‘ülâhır sene 1197 Şühûdü’l-hâl: Mehmed Ağa b. Hüseyin, Molla Ali b. Halil, Hacı Hasan b. Osman.