Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 323 Hüküm no: 340 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtib Murad mahallesinden Mehmed Said’in ebniyesi mülk olan evini Yeniçeri Ocağı hasekilerinden Osman Ağa’ya satması Mukāta‘alı arsa ve ebniyesi mülk mübâya‘ası Mahmiye-i İslâmbol’da Mevlevîhâne Yenikapısı dâhilinde Kâtib Murad mahallesinde sâkin Mehmed Said b. Mustafa nâm kimesne meclis-i şer‘-i şerîf-i enverde Dergâh-ı âlî Yeniçeri Ocağı hasekilerinden işbu bâ‘isü’l-vesîka Osman Ağa b. Ömer nâm kimesne mahzarında ikrâr ve takrîr-i kelâm edip arsası mahalle-i mezbûre müezzinine senevî yüz yirmi akçe mukāta‘a-i kadîmeli üzerinde olan bi’l-cümle ebniyesi akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahalle-i mezbûrede vâki‘ bir tarafdan Âişe Hatun menzili ve bir tarafdan el-Hâc Mehmed menzili ve bir tarafdan Elif Hatun menzili ve bir tarafdan tarîk-i âm ile mahdûd fevkānî iki bâb oda ve sofa ve kenîf ve bi’r-i mâ ve havlu ve eşcâr-ı müsmireli bağçeyi müştemil bir bâb menzilin ebniye-i mezkûresini tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Osman Ağa’ya iki yüz yirmi iki guruşa bey‘ ve temlik ve teslîm <> ve arsasını dahi bâ-ma‘rifet-i mütevellî meccânen ferâğ ve tefvîz eylediğimde ol dahi ber-vech-i muharrer iştirâ ve temellük ve tesellüm ve tefevvüz ve kabûl eyledikden sonra semeni olan meblağ-ı mezbûr iki yüz yirmi iki guruşu mezbûr Osman Ağa yedinden tamamen ahz ü kabz eyledim, ba‘de’l-yevm menzil-i mahdûd-ı mezkûrun ebniyesi mezbûr Osman Ağa’nın mülk-i müşterâsı <> ve arsası dahi bâ-ma‘rifet-i mütevellî dâhil-i havza-i tasarrufu olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 5 R sene 1197 Şühûdü’l-hâl: İsmail b. İbrahim, Ali b. Abdullah, Mustafa b. Bektaş, Duhânî Süleyman b. Abdullah, Molla Ali b. Halil, Salih b. Halil.