Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 323 Hüküm no: 341 Orijinal metin no: [49a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sancakdar Hayreddin mahallesindeki yanan vakıf evin arsasının, üzerine yapacakları binanın mülkleri olmak üzere Hasan b. Hüseyin ile karısı Şerife Vahide’ye kiraya verilmesi İstihkâm ve binânın mülkiyetine mütevellî izni Mahmiye-i İslâmbol’da Sancakdâr Hayreddin mahallesinde vâki‘ bir tarafdan Tesbîhî Ali Efendi veresesi arsası ve bir tarafdan Ahmed ve Mehmed tasarruflarında olan arsa ve iki tarafdan tarîk-i hâs ile mahdûd tûlen ve arzan bi-hesâbı terbî‘i doksan sekiz zirâ‘ arsa üzerinde mebnî ma‘lûmü’l-müştemilât bir bâb menzilin bi’l-meşrûta mütevellîsi es-Seyyid Mehmed Sadık b. es-Seyyid Salih meclis-i şer‘-i hatîr-i lâzımü’t-tevkīrde menzil-i mezkûrun beher şehr on beşer akçe icâre-i müeccele ve mu‘accele-i ma‘lûme ile mutasarrıfları işbu bâ‘isetü’l-vesîka zâtı ba‘de’t-ta‘rîfi’ş-şer‘î kendi nefsinden asîl ve zevci Hasan b. Hüseyin tarafından vech-i âtî üzere tasdîka vekîl olduğu ber-nehc-i şer‘î sâbit olan Şerife Vahide bt. es-Seyyid el-Hâc Mahmud nâm hatun mahzarında bi’t-tevliye takrîr-i kelâm ve bast-ı merâm edip mütevellîsi olduğum menzil-i mahdûd-ı mezkûr bundan akdem vâki‘ olan harîkde bi’l-külliye muhterik olup arsası sırfa kalmağla arsa-i mezkûre üzerine vakıf içün icâre-i mu‘accelesine mahsûben müceddeden binâya zevcân-ı mezbûrân ve âharı dahi rağbet etmeyip ve cânib-i vakıfda dahi binâya müsâ‘ade olmamağın arsa-i mezkûre yine müeccele-i kadîmesiyle üzerine müceddeden ihdâs olunan binâ bânîsinin mülkü olmak üzere izin verilmek cânib-i vakfa evlâ ve enfa‘ olduğu zeyl-i kitâbda muharrerü’l-esâmî Müslimîn ihbârlarıyla zâhir ve ben bi’t-tevliye mezûn olduğumdan sonra ben dahi taraf-ı vakıfdan bi’t-tevliye zevcân-ı mezbûrân Hasan ve Şerife Vahide yedlerine müceddeden i‘tâ eylediğim bir kıt‘a temessük mantûkunca arsa-i mahdûde-i mezkûreyi beher şehr on beş akçe icâre-i müeccele-i kadîmesiyle zevcân-ı mezbûrân Hasan ve Şerife Vahide Hatun’a bi’t-tevliye îcâr ve teslîm ve üzerine mâllarıyla ihdâs eyledikleri binâ kendi mülkleri olmak üzere bi’t-tevliye izin verdiğimde onlar dahi ber-vech-i muharrer istîcâr ve tesellüm ve kabûl etmekle ber-vech-i muharrer zevcân-ı mezbûrân arsa-i mezkûre üzerine mâllarıyla her ne binâ ihdâs ederler ise kendi mülkleri olmak üzere izin verdiğime binâen kıbel-i şer‘den dahi zevcân-ı mezbûrân yedlerine bir kıt‘a hüccet i‘tâ olunmak matlûbumdur dedikde hakīkat-i hâl minvâl-i meşrûh üzere olduğunu Müslimûn ihbâr ve mezbûre Şerife Vahide Hatun dahi bi’l-asâle ve bi’l-vekâle tasdîk etmeğin ber-mantûk-ı temessük mütevellî-i mezbûr arsa-i mahdûde-i mezkûreyi beher şehr on beş akçe icâre-i müeccele-i kadîmesiyle üzerine her ne binâ ederler ise kendi mülkleri olmak üzere zevcân-ı mezbûrân Hasan ve Şerife Vahide Hatun yedlerine li-ecli’l-istihkâm işbu vesîka-i enîka ketb u tahrîr ve i‘tâ olundu. Fî 5 Rebî‘ülâhir sene 1197 Şühûdü’l-hâl: Yeğen Ahmed Çavuş b. Ali, es-Seyyid Mehmed Emin b. es-Seyyid Hüseyin, Molla Ali b. Halil, Salih b. Halil, Hacı Hasan b. Osman ve gayruhum.