Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 325 Hüküm no: 343 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Efendi’nin Kürkçübaşı mahallesinde bulunan vakıf arsadaki enkazı Fatma Hatun’a satması Vakıf arsa derûnunda enkāz mübâya‘ası Medîne-i Üsküdar’da İhsaniye mahallesinde sâkin Ali Efendi b. Mahmud meclis-i şer‘-i şerîf-i enverde mu‘arrefetü’z-zât işbu bâ‘isü’l-kitâb Fatıma bt. Ömer nâm hatun mahzarında ikrâr ve takrîr-i kelâm edip arsası merkūm Za‘îm Mehmed Ağa nâm sâhibü’l-hayrın sulehâ ve sâlihâta meşrûta ve derûnunda mevcûd enkāz-ı ma‘lûmesi bâ-hüccet-i şer‘iye irsen yedimde mülk ve hakkım olup mahmiye-i İslâmbol’da Cerrâh kurbünde Kürkçübaşı mahallesinde vâki‘ bir tarafdan Saliha Hatun arsası ve bir tarafdan Bakizâde bağçesi ve bir tarafdan İbrahim Efendi bağçesi ve bir tarafdan ba‘zan Mustafa Ağa arsası ve ba‘zan tarîk-i hâs ile mahdûd derûnunda mevcûd enkāz-ı mezkûreyi tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûre Fatıma Hatun’a yirmi beş guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi beş guruşu mezbûre Fatıma Hatun yedinden tamamen ahz ü kabz eyledim ba‘de’l-yevm enkāz-ı mevcûde-i mezkûre, mezbûre Fatıma Hatun’un mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 9 Rebî‘ülâhır sene 1197 Şühûdü’l-hâl: Halil b. Ömer, Memiş Beşe b. ( ), Molla Ali b. Halil, Hacı Hasan b. Osman, Salih b. Halil.