Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 325 Hüküm no: 344 Orijinal metin no: [49b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed’in Küçük Langa’daki bahçede bulunan ekili sebzeler ile bazı bahçe âletlerini Nikola’ya satması Bağçe gediği mübâya‘ası Mahmiye-i İslâmbol’da Tavukpazarı kurbünde Horasancı Hanı’nda müsâfiren sâkin Mustafa b. el-Hâc Mehmed nâm kimesne meclis-i şer‘-i şerîf-i enverde işbu hâmilü’r-rakīm Nikola nâm zimmînin babası ve tarafından ber-vech-i âtî tasdîka vekîl olduğu nehc-i şer‘î ve tarîk-i mer‘î üzere sâbit olan Filyo v. Tarabako nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahmiye-i mezbûrede Küçük Langa kurbünde vâki‘ Süleyman Efendi Bostanı demekle arîf bostandan müfrez ma‘lûmü’l-hudûd bir kıt‘a bostan derûnunda mevcûd beyne’l-hıref gedik ta‘bîr olunur ber-mûceb-i defter sonradan eşcâr-ı müsmire ve on tahta pür-hâssa ve otuz tahta salata ve yirmi tahta soğan ve on tahta ma‘denüs ve dört bel ve üç tarak ve bir tencere ma‘a kapak ve bir arka küfesi ve bir heğbe sepeti ve sâir âlât-ı lâzıme-i ma‘lûmemi tarafeynden îcâb ve kabûlü hâvî bey‘-i kat‘î ve safka-i vâhide ile müvekkil-i merkūm Nikola zimmîye bin beş yüz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr bin beş yüz guruşu müvekkil-i merkūm Nikola zimmî yedinden tamamen ahz ü kabz edip mebî‘-i mezkûrun gabn ve tağrîrine müte‘allika âmme-i de‘âvîden müvekkil-i merkūm zimmînin zimmetini ibrâ ve ıskāt eylediğimde ol dahi ibrâ-i mezkûru kabûl ile ba‘de’l-yevm gedik ta‘bîr olunur eşcâr-ı müsmire ve sebzevât-ı mezrû‘a-i müdrike ve sâir âlât-ı lâzıme-i ma‘lûme müvekkil-i merkūm Nikola zimmînin mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 10 Rebî‘ülâhır sene 1197 Şühûdü’l-hâl: Es-Seyyid İsmail Ağa b. es-Seyyid İbrahim kethudâ, Mehmed Emin Ağa b. el-Hâc Mustafa, Mustafa Ağa b. Mehmed, Mehmed b. Mehmed, es-Seyyid Mustafa b. ( ), Molla Ali b. Halil, es-Seyyid Mehmed Beşe b. Mustafa berber, Ali Ağa b. Mehmed, Hacı Hasan b. Osman, Mustafa b. Mustafa, Yorgi v. Dimo yiğitbaşı, Miço v. İstanko, Viko v. Koça, Kiryako v. Mitro, Nikola v. Peşko, Marko v. Hıristo ve gayruhum.