Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 330 Hüküm no: 347 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Zeliha bt. Abdullah’ın kocasına evdeki eşyanın bir kısmını hibe edip bir kısmını da sattığı Eşyâ mübâya‘ası Mahmiye-i İslâmbol’da Ali Fakih mahallesinde sâkine Zeliha bt. Abdullah nâm hatun tarafından vech-i âtî üzere ikrâra vekîl olduğu zât-ı mezbûreyi ârifân Şeker Mehmed Ağa b. Ebîbekir ve Kürd Osman Beşe b. Ali nâm kimesneler şehâdetleriyle şer‘an sâbit olan Çorbacı Mehmed Ağa b. İsmail nâm kimesne meclis-i şer‘-i şerîf-i enverde müvekkile-i mezbûrenin hâlâ zevci işbu bâ‘isü’l-vesîka Abacı el-Hâc Mustafa Ağa b. Mehmed nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Zeliha Hatun’un zevci mezbûr zimmetinde mütekarrer ve ma‘kūdun-aleyh olan yirmi beş guruş mehr-i müecceli ile yedinde mâlı ve mülkü olan iki altın yüzük ve bir altın küpesini hibe-i sahîha-i şer‘iye ile târih-i kitâbdan iki ay mukaddem zevci mezbûr el-Hâc Mustafa Ağa’ya hibe ve temlik ve teslîm ve eşyâ-i sâiresinden yün memlû on sekiz köhne yemeni yasdık ve yedi minder ve iki döşek ve beş baş yasdığı ve yedi müsta‘mel yemeni yorgan ve beş yemeni mak‘ad ve üç köşe şiltesi ve iki sini ve bir kākum kürk ve keremsûda kaplı bir kedi kürk ve iki cedîd Şam alacası entari ve iki müsta‘mel ferâce ve iki seccâde ve on beş vakıyye evân-ı nühâsiyesini dahi yine târih-i mezbûrede tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevci mezbûr el-Hâc Mustafa Ağa’ya yüz guruşa bey‘ ve temlik ve teslîm eylediğinde ol dahi târih-i mezbûrda ber-vech-i muharrer ittihâb ve temellük ve iştirâ ve tesellüm ve kabz ve kabûl eylediğinden sonra semeni olan meblağ-ı mezbûr yüz guruş mutâlebesinden müvekkilem mezbûre Zeliha Hatun zevci mezbûr el-Hâc Mustafa Ağa’nın zimmetini ibrâ ve ıskāt eylediğinde ol dahi ibrâsını kabûl etmeğin ol-vechile mehr-i mezkûr yirmi beş guruşdan târih-i mezbûrdan beri zevci mezbûr el-Hâc Mustafa Ağa’nın zimmeti berî ve zikr olunan hulîler mülk-i mevhûbu ve eşyâ-i muharrere-i mezkûre dahi mülk-i müşterâsı ve hakk-ı sarfı olup müvekkilem mezbûre Zeliha Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î vekîl-i mezbûr Mehmed Ağa yine meclis-i şer‘de zevci mezbûr el-Hâc Mustafa mahzarında i‘âde-i kelâm edip müvekkilem mezbûre zevci mezbûr el-Hâc Mustafa Ağa ile mahalle-i mezbûrede mâ‘an sâkinler olduğu menzil derûnunda mevcûd mefrûşât ve melbûsât ve evân-ı nühâsiye ve gayr-ı nühâsiye ve bi’l-cümle eşyâ-i sâire zevci mezbûr el-Hâc Mustafa Ağa’nın mâlı ve mülkü olup müvekkilem mezbûre Zeliha Hatun’un kat‘a alâka ve medhali yokdur dedikde mâ-vaka‘a bi’t-taleb ketb olundu. Fî 10 min-şehri Rebî‘ülâhir sene 1197 Şühûdü’l-hâl: Şeker Mehmed Ağa b. Ebîbekir, Kör Osman Beşe b. Ali, el-Hâc Mehmed Ağa b. es-Seyyid Abdullah, Mısırlı Halil Ağa b. İbrahim, Abacı Molla Mustafa b. Hasan, Molla Ali b. Halil, Ali Ağa b. Mehmed ve gayruhum.