Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 331 Hüküm no: 348 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sancakdarzade Ahmed Ağa’nın kayınpederine olan borcuna karşılık önce evini vefaen verdiği, ev yandıktan sonra da arsasını sattığı Menzili mukaddemâ vefâen bey‘ ba‘dehû fekk ve kat‘a bey‘ ve teslîm İşbu sebt-i kenâr olunan hüccet derûnunda mezkûrü’l-ism olup mahmiye-i İslâmbol’da Kadırga Limanı kurbünde ( ) mahallesinde sâkin Sancakdârzâde Ahmed Ağa b. Mehmed Çavuş meclis-i şer‘-i hatîr-i lâzımü’t-tevkīrde yine derûn-ı hüccetde mezkûrü’l-ism kayın pederi ve hâlâ mukābele-i süvârî ser-halîfesi umdetü erbâbi’t-tahrîr ve’l-kalem zübdetü ashâbi’t-tastîr ve’r-rakam bâ‘isü hâze’l-kitâbi’l-müstetâb el-Hâc İsmail Efendi b. Abdülbâki mahzarında ikrâr-ı tam ve takrîr-i kelâm edip bin yüz seksen iki senesi[nde] kayınpederim mûmâ-ileyh el-Hâc İsmail Efendi yedinden ber-mûceb-i temessük bi-tarîki’l-karz zimmetimde lâzımü’l-edâ deynim olmağla deyn-i mezkûrum olan meblağ-ı mezbûr mukābelesinde yine derûn-ı hüccetde mastûr tahdîd ve tavsîf olunan bir bâb mülk menzilimi kayınpederim mûmâ-ileyh el-Hâc İsmail Efendi’ye vefâen bey‘ ve teslîm eylediğimde ol dahi ber-vech-i muharrer ba‘de’l-iştirâ ve’t-tesellüm ben deyn-i meblağ-ı mezbûru kable’l-edâ ve’l-fek menzil-i mezkûr bundan akdem vâki‘ olan harîk-i kebîrde bi’l-külliye muhterik olup arsa sırfa kalmağla ben deyn-i meblağ-ı mezbûru kayınpederim mûmâ-ileyhe edâ ve teslîm etmeksizin bi’r-rızâ arsa-i mezkûreyi bana red ve teslîm ben dahi ba‘de’t-tesellüm ve’l-kabûl ben arsa-i mezkûreyi derûnunda vâki‘ bir kârgîr hamam ve sâir enkāz-ı mevcûde-i ma‘lûmesiyle tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile kayınpederim mûmâ-ileyh el-Hâc İsmail Efendi’ye üç bin yüz elli guruşa bey‘ ve temlik ve teslîm ve semeni olan meblağ-ı mezbûr üç bin yüz elli guruşu deyn-i mezkûrum olan üç bin yüz elli guruşa takas ve mahsûb eylediğimde ol dahi ber-minvâl-i muharrer iştirâ ve temellük ve tesellüm ve mukāssa ve kabûl edip ol-vechile deyn-i meblağ-ı mezbûr üç bin yüz elli guruşdan benim zimmetimi berî ve arsa-i mezkûre cemî‘ müştemilâtıyla kayınpederim mûmâ-ileyh el-Hâc İsmail Efendi’nin mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde mûmâ-ileyh el-Hâc İsmail Efendi’nin dahi dâmâdı mukırr-ı mezbûr Ahmed Ağa’yı cemî‘ kelimât-ı meşrûhasında vicâhen ve şifâhen tahkīk ve tasdîk etmeğin mâ-vaka‘a bi’t-taleb. Fî 12 Rebî‘ülâhır sene 1197 Şühûdü’l-hâl: Es-Seyyid Mehmed Şükrü Efendi b. el-Hâc Hasan, el-Hâc Süleyman b. İsmail, Ali Ağa b. Osman, Mehmed b. Nasuh, Molla Ali b. Halil, Salih b. Halil, Ali Ağa b. Mehmed.