Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 332 Hüküm no: 349 Orijinal metin no: [50b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Abdullah’ın bazı eşyasını İbrahim Beşe’ye sattığı Eşyâ mübâya‘ası Mahmiye-i İslâmbol’da Müneccim Sa‘di mahallesinde sâkine ve zâtı vech-i şer‘î üzere mu‘arrefe olan Rukiye bt. Abdullah nâm hatun meclis-i şer‘-i şerîf-i enverde işbu bâ‘isü’l-kitâb İbrahim Beşe b. Mehmed nâm kimesne mahzarında ikrâr ve takrîr-i kelâm edip eşyâ-i memlûkemden bâ-defter-i müfredât kıtık memlû altı çit yasdık ve üç minder ve üç çit mak‘ad ve bir Yanbolu kebesi ve iki yemeni yorgan ve bir çârşeb ve iki köhne şali entari ve bir tencere ma‘a kapak ve bir kahve ibriği ve iki lengerimi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûr İbrahim Beşe’ye on beş guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr on beş guruş mutâlebesinden mezbûr İbrahim Beşe’nin zimmetini ibrâ ve ıskāt eylediğimde ol dahi ibrâmı kabûl eyledi ba‘de’l-yevm eşyâ-yı muharrere-i mezkûre mezbûr İbrahim Beşe’nin mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 12 Rebî‘ülâhir sene 1197 Şühûdü’l-hâl: İmâm Hafız İbrahim Efendi b. Mehmed, Müezzin İsmail Efendi b. Mehmed, Mehmed Said Efendi b. el-Hâc İbrahim, Ömer Efendi b. Mustafa, İbrahim b. Ali, Hüseyin Beşe [b.] İsmail, Süleyman b. Ahmed ve gayruhum.