Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 332 Hüküm no: 350 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Ali’nin Kostandi için cerime olarak Hasan Ağa’ya verdiği mallarla alakalı davasından vazgeçtiği Meccânen ibrâ Mahmiye-i İslâmbol’da Yeniodalar’da Dergâh-ı âlî yeniçerinin yetmiş üç cemâ‘atin odasında sâkin ve oda-i mezkûrun hâlâ aşcısı Hasan b. Ali nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Cebeli? ağası diğer Hasan Ağa b. Abdurrahman tarafından husûs-ı âti’l-beyânı tasdîka vekîl olduğu nehc-i şer‘î ve tarîk-i mer‘î üzere sâbit olan el-Hâc Mehmed Ağa b. Abdullah nâm kimesne mahzarında ikrâr-ı tam ve takrîr-i kelâm edip bundan akdem gāib ani’l-meclis Kostandi nâm zimmî içün cerîme nâmıyla emlâkimden bir re’s al bârgir ve bir kaput ve bir kahve takımı ve bir sîm pandül sâ‘atimi müvekkil-i mezbûr diğer Hasan Ağa’ya def‘ ve teslîm ol dahi yedimden ba‘de’l-ahz ve’l-kabz zikr olunan bârgir ile eşyâ-i muharrere-i mezkûreyi bu esnâda müvekkil-i mezbûr diğer Hasan Ağa’dan taleb ve da‘vâya tesaddî etmiş idim. El-hâletü hâzihî beynimizde muslihûn tavassutuyla ber-vech-i muharrer tesaddî eylediğim da‘vâ-yı mezkûremden meccânen fâriğ olup zikr olunan bârgire ve eşyâ-i muharrere-i mezkûreye ve sâire müte‘allika âmme-i de‘âvî ve kâffe-i mutâlebâtdan müvekkil-i mezbûr diğer Hasan Ağa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîk. Fî 11 min-R sene 1197 Şühûdü’l-hâl: Kuzâtdan Ali Efendi b. ( ), Kuzâtdan Hasan Efendi, Kuzâtdan Mustafa Efendi b. ( ), Melek Mustafa Ağa b. Osman, Buhûrî Mustafa Ağa, Molla Ali b. Halil.