Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 333 Hüküm no: 351 Orijinal metin no: [51a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Efendi’nin yanmış olan evinin arsasını İsmail Efendi’ye satması Sebt-i kenâr olan arsanın mübâya‘ası Mahmiye-i İslâmbol’da Nuri Dede mahallesinde sâkin ve hâlâ mukābele süvârî kalemi ser-halîfesi umdetü erbâbi’t-tahrîr ve’l-kalem zübdetü ashâbi’t-tastîr ve’r-rakam el-Hâc İsmail Efendi b. Abdülbâki meclis-i şer‘-i hatîr-i lâzımü’t-tevkīrde hâlâ nur? halîfesi bâ‘isü hâze’l-kitâbi’l-müstetâb İsmail Efendi b. Osman Efendi tarafından tasdîka vekîl olduğu nehc-i şer‘î ve tarîk-i mer‘î üzere sâbit olan Hasan Ağa b. Mustafa nâm kimesne mahzarında ikrâr-ı tam ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahmiye-i mezbûrede Kasab İlyas mahallesinde kâin bir tarafdan mevkūfât kalemi kîsedârı İsmail Efendi menzili arsası ve bir [tarafdan] ba‘zan sâbık piyâde kalemi ser-halîfesi merhûm Yahya Efendi veresesi arsası ve ba‘zan Ketânîzâde Ahmed Ağa menzili arsası ve bir tarafdan Âişe Hatun menzili arsası ve bir tarafdan tarîk-i hâs ile mahdûd derûnunda bir bi’r-i mâ ve bir kârgîr hamam ve sâir enkāz-ı mevcûde-i ma‘lûmeyi hâvî bir bâb muhterik mülk menzil arsamı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile müvekkil-i mûmâ-ileyh İsmail Efendi’ye dokuz yüz kırk beş guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr dokuz yüz kırk beş guruşu müvekkil-i mûmâ-ileyh İsmail Efendi yedinden tamamen ahz ü kabz edip mebî‘-i mezkûrun gabn ve tağrîrine müte‘allika âmme-i de‘âvî ve kâffe-i mutâlebâtdan müvekkil-i mûmâ-ileyh İsmail Efendi’nin zimmetini ibrâ-i âmm-ı sahîh-i şer‘î ile ibrâ ve ıskāt eylediğimde ol dahi ibrâmı kabûl eyledi ba‘de’l-yevm arsa-i mahdûde-i mezkûre enkāz-ı mevcûdesiyle müvekkil-i mûmâ-ileyh İsmail Efendi’nin mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 13 R sene 1197 Şühûdü’l-hâl: Mukābele Süvârî Kalemi Kîsedârı Memiş Efendi b. el-Hâc Ali Çavuş Ağa, Silahdâr kalemi hulefâlarından Ali Beyefendi b. el-Hâc Ali Çavuş, Ali Ağa b. Osman, Mehmed Ağa b. Osman, Molla Ali b. Halil, Mehmed Ağa b. Ali, Hüseyin Ağa b. Mehmed.