Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 334 Hüküm no: 352 Orijinal metin no: [51a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ömer ile Kavukçu Ömer’in boşanması İstihbâr-ı tatlîk Mahmiye-i İslâmbol’da İskender Ağa mahallesinde sâkine ve zâtı ta‘rîf-i şer‘î ile mu‘arrefe olan işbu bâ‘isetü’l-vesîka Âişe bt. Ömer nâm hatundan meclis-i şer‘de ber-vech-i âtî istihbâr-ı şer‘î sudûrundan sonra udûl-ı ahrâr-ı Müslimîn’den ve mahalle-i mezbûre ahâlisinden Derviş Ahmed b. Osman ve İbrahim b. Mehmed nâm kimesneler zât-ı müstahbire-i mezbûreyi ârifân oldukları hâlde li-ecli’l-ihbâr meclis-i şer‘a hâzırân olup istihbâr olunduklarında fi’l-hakīka işbu müstahbire-i mezbûrenin zevci Kavukçu Ömer b. İbrahim nâm kimesne işbu târih-i kitâb senesi Saferi’l-hayrının yirmi altıncı günü mahalle-i mezbûrede zevcesi müstahbire-i mezbûre ile mâ‘an sâkin olduğu menzili kapısı önünde bizim huzûrumuzda zevcesi müstahbire-i mezbûreye hitâb edip eğer ben ba‘de’l-yevm diyâr-ı âhara gider isem zevcem mezbûre Âişe Hatun benden boş olsun deyü şart ve ta‘lîk eyledikden sonra on gün mürûrunda mezbûr Kavukçu Ömer Kefere İzmir’ine firâr edip ol-vechile müstahbire-i mezbûre Âişe Hatun zevci mezbûr Ömer’den mutallaka olmuşdur, biz bu husûsa bu vech üzere şâhidleriz ve inde’l-hasm şehâdet dahi ederiz deyü her biri meclis-i şer‘de alâ-tarîki’ş-şehâde haber vermeleriyle vâkı‘u’l-hâl hıfzen li’l-makāl bi’t-taleb. Fî 16 R sene 1197 Şühûdü’l-hâl: Derviş Ahmed b. Osman, İbrahim b. Mehmed, Molla Ali b. Halil, Salih b. Halil, Hacı Hasan b. Osman.